«AAN abviaściła 2008 hod «Mižnarodnym hodam bulby…
Bulba — najvažniejšy pradukt u našaj krainie. Biełaruś uvachodzić u vaśmiorku najbolš bujnych vytvorcaŭ bulby u śviecie i zajmaje pieršaje miesca pa vytvorčaści jaje na dušu nasielnictva».
Z hazetnaj publikacyi
Heta słovy, ź jakich možna pieśniu tvaryć:
«Dzie ty chodziš? Čakaju. Staŭlu bulbu varyć…»
Słovy tyja zaŭsiody kazalisia ŭ čas,
słovy tyja hučali tady jakraz,
kali ty stupaŭ na žyćciovuju hać,
kali dumaŭ, jak być i kaho kachać,
byŭ hatovy adčajem siabie maryć…
Čuŭsia hołas tady: «Staŭlu bulbu varyć».
Słovy tyja vyvodzili na šlach.
Stanaviłasia ź imi śviatlej u vačach.
Biełaruskam nia treba, aproč hetych słoŭ,
nahavornaha ziella, čaraŭ — zamoŭ.
Biełaruska znaje, čym mužčynu skaryć,
jak da serca jaho ściažynu taryć
dy na movie jakoj ź im havaryć.
Prosta kaža: «Ja staŭlu ŭžo bulbu varyć».
Inšym razam moža jašče paŭtaryć:
«Nie marudź, nie spaźniajsia!
Staŭlu bulbu varyć».
* * *
Čytajcie štodzionna ŭ rubrycy «Litaratura» na sajcie NN tvory i minijatury. Dla serca, dla rozumu, dla movy.
