Biełarus 2008. Litaraturny almanach biełaruskich piśmieńnikaŭ zamiežža. Ńju-Jork: Vydaviectva hazety «Biełarus». 2008. - 205 s.
U Ńju-Jorku druhi hod zapar vychodzić almanach tych biełaruskich litarataraŭ, jakija stała žyvuć za miažoj. Hieahrafija biełaruskaha pryhožaha piśmienstva prezentavanaja šyroka jak redka kali: ad sumiežnych Litvy, Polščy, Rasiei i Łatvii, da dalokich Aŭstralii, Kanady, Izrailu i ZŠA. Siarod aŭtaraŭ składanki: Siaržuk Sokałaŭ-Vojuš, Maks Ščur, Vital Voranaŭ, Jury Hil.
Tendencyja — emihranckija aŭtary pakrysie pakidajuć svoj tradycyjny płač ab pakinutaj staroncy, prynamsi źmienšajuć jaho častatu, zasiarodžvajučysia na svaich novych krainach. Na radaść cikaŭnym da ŭsiaho novaha čytačam u Biełarusi i na karyść biełaruskaj prysutnaści ŭ śviecie.
Akramia aryhinalnych tvoraŭ u zbornik uvajšli taksama pierakłady. Aŭstralijec Kavaleŭski Viktar abiełarusiŭ Artura Klarka, a kanadyjka Iryna Vierabiej pierakłała indyjanskija lehiendy.
