Uładzimir Pucin akazaŭ cisk na ŭkrainskich sieparatystaŭ, kab tyja spynili ahoń apoŭnačy 15 lutaha, havorycca ŭ zajavie kanclera Hiermanii Anhieły Mierkiel pa vynikach minskaj sustrečy lidaraŭ «narmandskaj čaćviorki», jakaja apublikavana na sajcie fiederalnaha ŭrada FRH.
Pa słovach Mierkiel, vyniki sustrečy dajuć peŭnyja nadziei, ale nijakich iluzij na hety kont u jaje niama.
Udzielniki samitu damovilisia ab usieahulnym vykanańni minskich pahadnieńniaŭ, adnak «dla hetaha pavinny być zroblenyja kankretnyja kroki, i napieradzie jašče šmat pieraškod», skazała kancler FRH. «U mianie niama nijakich iluzij, napieradzie jašče vielmi šmat pracy, ale jość realny šaniec palepšyć situacyju. Hiermanija i Francyja pakazali, što jany mohuć unieści ŭkład u mirny praces razam z usioj Jeŭropaj», — dadała jana.
«My, jak lidary narmandskaha farmatu, uziali na siabie abaviazacielstvy kantralavać praces vykanańnia pahadnieńnia i zrabić usio, što ŭ našych siłach, dla jaho prasoŭvańnia. Ja čakaju, što takija namahańni spatrebiacca», — adznačyła kancler FRH.
U svaju čarhu prezident Francyi Fransua Ałand padkreśliŭ: usioabdymnaje palityčnaje pahadnieńnie, da jakoha pryjšli ŭdzielniki minskich pieramovaŭ (majecca na ŭvazie kompleks mier pa vykanańni minskich pahadnieńniaŭ, padpisany ŭdzielnikami trochbakovaj kantaktnaj hrupy), «uklučaje ŭsie sprečnyja pytańni, pačynajučy ad pieramirja, spynieńnia ahniu i kantrolu za miežami až da pytańnia decentralizacyi i advodu ciažkich uzbrajeńniaŭ i adnaŭleńnia ekanamičnych adnosinaŭ».
«Usia Jeŭropa ŭziała na siabie abaviazacielstva padtrymlivać hety praces. Siońnia ŭ druhoj pałovie dnia my ŭdzielničajem u pasiadžeńni savieta ŭ Brusieli (samit ES). My zrobim usio dla taho, kab Jeŭropa padtrymlivała hety praces. Choć my jašče i nie ŭsiaho dasiahnuli, u nas jość nadzieja dla Ukrainy i ŭsioj Jeŭropy. I my jašče raz pakazali, što niamiecka-francuzski tandem u stanie zrabić niešta, što pryviadzie da miru», — zapeŭniŭ Ałand.
