Aryštavany pa padazreńni ŭ dziaržaŭnaj zdradzie supracoŭnik adździeła źniešnich carkoŭnych suviaziaŭ (AZCS) Maskoŭskaha patryjarchatu (MP) Jaŭhien Pietryn zvolniŭsia z FSB u 2013 hodzie, ale z tych časoŭ nie pierastavaŭ vieści kontrvyviednickuju dziejnaść.
Jaŭhien Pietryn, fota z sacsietak
Pra heta raspavioŭ jaho brat Alaksiej Pietryn. Pa słovach svajaka abvinavačanaha, u AZCS jaho brat raskryŭ ahienturnuju sietku, jakaja pracavała «na raskoł ruskaj i ŭkrainskaj carkvy», ale ŭ chodzie svajho rasśledavańnia sam patrapiŭ pad artykuł.
Pa słovach Alaksieja Pietryna, jaho brat Jaŭhien Pietryn uładkavaŭsia na pracu ŭ FSB u 2011 hodzie. «Da hetaha jon skončyŭ vajennuju akademiju ŭ Maskvie, zaŭsiody chacieŭ słužyć radzimie. Jon nam tołkam nie raskazvaŭ ničoha, kali pryjazdžaŭ dadomu ŭ Irkuckuju vobłaść, pakolki heta sakretnaja słužba. Va ŭsiakim vypadku ja razumieŭ, što jon pracavaŭ u ranhu majora i zajmaŭsia kontrvyviedkaj», — raspavioŭ jon.
Pa słovach spadara Pietryna, jaho brat zvolniŭsia ź dziaržorhanaŭ u 2013 hodzie z-za kanfliktu z načalstvam, jakomu nibyta nie padabałasia jaho zališniaja aktyŭnaść na słužbie. U žniŭni taho ž hoda Jaŭhien Pietryn pryjšoŭ pracavać u AZCS MP i staŭ padumvać ab karjery śviatara. «Ale sačyć za stanoviščam jon nikoli nie pierastavaŭ, tamu jamu ŭdałosia vyjavić siarod supracoŭnikaŭ patryjarchatu ukaranionych ahientaŭ, jakija pracujuć na karyść ZŠA na raskoł Ruskaj i Ukrainskaj pravasłaŭnych carkvy», — śćviardžaje brat abvinavačanaha.
Pa słovach Alaksieja Pietryna, płan ukaranionych špijonaŭ zaklučaŭsia ŭ pasłableńni ŭpłyvu RPC na terytoryi Ukrainy, u tym liku z dapamohaj stvareńnia kanfliktu pamiž joj i UPC. Adnym z kaardynataraŭ hetaj schiemy, śćviardžaje Alaksiej Pietryn, byŭ upraŭlajučy partnior mižnarodnaj jurydyčnaj kampanii CMS Cameron McKenna LLC Daniel Biłak, jaki pražyvaje va Ukrainie. Jaho firma va Ukrainie, u pryvatnaści, pradstaŭlaje intaresy mnohich zamiežnych kancernaŭ, u tym liku, jak paviedamlajuć ŚMI, Shell i Exxon.
Adnak, pa słovach Alaksieja Pietryna, sabranaja im infarmacyja nie zacikaviła FSB, tamu jon vyrašyŭ praciahnuć znosiny ź nibyta ŭkaranionymi ahientami, kab «vyvudzić ź ich bolš infarmacyi». «Jon staŭ vieści svajo rasśledavańnie, kab atrymać bolš faktaŭ, tamu i mieŭ znosiny z hetymi asobami ŭ ramkach zakona. Ale ŭ FSB ŭ vyniku vyrašyli, što jon, naadvarot, zdavaŭ im dziaržtajamnicy», — kaža brat abvinavačanaha.
U krasaviku 2014 Jaŭhien Pietryn adpraviŭ u FSB apošni list, a ŭžo ŭ červieni da jaho ŭ chatu ŭvarvalisia apieratyŭniki i pradjavili pastanovu ab pieratrusie pa spravie ab dziaržzdradzie. «Paśla jaho katavali 14 hadzin, kab jon zaniaŭsia samaahavorvańniem. Jamu pahražali pravakacyjaj suicydu, i jon vymušany byŭ pryznać svaju vinu», — skazaŭ spadar Pietryn.
Jak śćviardžaje brat abvinavačanaha, niekalki miesiacaŭ toj byŭ upeŭnieny, što «śledstva va ŭsim raźbiarecca», ale zatym staŭ pisać skarhi ŭ Hienprakuraturu, FSB i Śledčy kamitet. U svaich skarhach Jaŭhien Pietryn śćviardžaŭ, što pakazańni ź jaho vybivali śledčyja FSB Dzianis Krochmal i jaho načalnik Alaksandr Sojma. Adnak nahladnyja orhany nie znajšli paćvierdžańnia hetych skarhach, i ŭ vyniku da abvinavačvańnia ŭ dziaržzdradzie dadalisia abvinavačvańni ŭ paklopie. «My doŭha sprabavali zrazumieć, što rabić, ale ciapier brat dazvoliŭ dać spravie chod», — kaža Alaksiej Pietryn.
