Karcinu Pola Hahiena «Nafea Faa Ipoipo» («Kali ž ty vyjdzieš zamuž?») pradali za rekordnyja $ 300 młn, piša The New York Times sa spasyłkaj na krynicy ź Jeŭropy i ZŠA. Pa najaŭnaj infarmacyi, heta samaja vysokaja cana, kali-niebudź vypłačanaja za tvor mastactva.
Na karcinie, jakaja datujecca 1892 hodam, namalavanyja dźvie žycharki Taici. Pałatno naležała pryvatnamu kalekcyjanieru i eks-supracoŭniku Sotheby's z Šviejcaryi Rudolfu Štechielinu. 62-hadovy Štechielin paćvierdziŭ fakt prodažu karciny.
Hazieta ŭdakładniaje, što šviejcarski kalekcyjanier vałodaje praź siamiejny trast bolš jak 20 pracami impresijanistaŭ i postimpresijanistaŭ (u tym liku pałatnom Hahiena), jakija možna ŭbačyć u Mastackim muziei Baziela na praciahu amal 50 apošnich hadoŭ.
Pa słovach dvuch art-dyleraŭ, kupcom karciny Hahiena stała arhanizacyja Qatar Museums. «Ja nie admaŭlaju i nie paćviardžaju heta», — skazaŭ Štechielin. Ab canie pałatna jon havaryć admoviŭsia. U Qatar Museums na zapyt ab kamientary nie adkazali.
Papiarednim rekardsmienam ličyłasia karcina Pola Siezana «Hulcy ŭ karty», za jakuju bahaty hazam Katar, pavodle niekatorych źviestak, zapłaciŭ u 2011 hodzie $250 młn.
Pałatno Hahiena ŭ lutym možna budzie ŭbačyć u Bazieli na vystavie, pryśviečanaj hetamu mastaku. Zatym kalekcyja adpravicca ŭ Madryd i Vašynhton. Pa słovach Štechielina, novy haspadar karciny ustupić u vałodańnie ŭ nastupnym studzieni.
