U rasijskim pravaabarončym centry «Miemaryjał» nazvali złačynnym rašeńnie kiraŭnika samaabvieščanaj Danieckaj narodnaj respubliki bolš nie brać pałonnych. Pravaabaroncy ŭpeŭnienyja, što heta parušaje Mižnarodnaje humanitarnaje prava.
«Ja addam zahad bolš pałonnych nie brać. Nam nie patrebnyja abmieny», — abviaściŭ 23 studzienia lidar prarasijskich terarystaŭ Danbasa Zacharčanka. Jon rastłumačyŭ, što takoje rašeńnie pryniata paśla abstrełu tralejbusnaha prypynku ŭ Daniecku, z-za čaho zahinuli kala 10 čałaviek.
«Taki zahad złačynny, — niezaležna ad taho, jak kvalifikavać uzbrojeny kanflikt na ŭschodzie Ukrainy: jak mižnarodny kanflikt ci jak hramadzianskuju vajnu», — havorycca ŭ zajavie «Miemaryjału».
Pravaabaroncy spasyłajucca na normy Mižnarodnaha humanitarnaha prava i Ženieŭskija kanviencyi.
Nasupierak normam hetych kanviencyj, bajeviki ŭžo dvojčy arhanizoŭvali «parad pałonnych» pa vulicach Daniecka.
U Danbasie ŭkrainskaj armii procistajać uzbrojenyja atrady DNR i ŁNR. Jany ŭzbrojenyja rasijskaj zbrojaj i častkova ŭkamplektavany «dobraachvotnikami z Rasii». Rasija, adnak, nazyvaje hetyja atrady «miascovymi apałčencami». Dziejańni bajevikoŭ kaardynuje były kiraŭnik KDB Prydniastroŭja Anciufiejeŭ, pieradavymi šturmavymi atradami kiravaŭ pałkoŭnik FSB Hirkin.
