Ministerstva ŭnutranych spraŭ Biełarusi pradstaviła svoj punkt hledžańnia na pytańnie ab pryciahnieńni da adkaznaści darmajedaŭ, prablema isnavańnia jakich abmiarkoŭvałasia 20 kastryčnika na naradzie ŭ prezidenta.
Jak paviedamlaje ŭpraŭleńnie infarmacyi i hramadskich suviaziaŭ MUS, letaś va ŭrad ź milicejskaha viedamstva ŭžo nakiroŭvalisia prapanovy pa vypraŭleńni situacyi. Praŭda, jany nie znajšli dastatkovaj padtrymki. U pryvatnaści, prapanoŭvałasia zadziejničać miechanizm administracyjnaj adkaznaści.
U 2014 hodzie amal 23 tysiačy (60%) abvinavačvanych va ŭčynieńni roznych złačynstvaŭ nie pracavali i nie vučylisia. Hetaja katehoryja na praciahu apošnich hadoŭ stabilna składaje amal dźvie traciny pravaparušalnikaŭ. A efiektyŭnyja ryčahi ŭździejańnia, jakija prymušajuć hramadzian da karysnaj dla hramadstva pracy, praktyčna adsutničajuć. Takaja situacyja surjozna pavialičvaje kryminahiennyja ryzyki.
Pavodle słoŭ načalnika ŭpraŭleńnia prafiłaktyki MUS Aleha Karazieja, i pryciahvać ludziej da pracy, i papraŭlać biudžet dapamahło b uviadzieńnie administracyjnaj adkaznaści. Naprykład, štrafavać paŭnaletnich pracazdolnych hramadzian, jakija pastajanna žyvuć na terytoryi Biełarusi i jakija bolš za šeść miesiacaŭ na praciahu hoda ŭchilajucca ad finansavańnia dziaržaŭnych raschodaŭ (šlacham vypłaty padatkaŭ, zboraŭ i inšych płaciažoŭ). A dla złosnych uchilistaŭ praduhledzieć aryšt z abaviazkovym pryciahnieńniem da pracy.
Adnačasova, ličać u ministerstvie, patrabujecca ŭniasieńnie dapaŭnieńniaŭ i ŭ PVKoAP — u častcy nadzialeńnia supracoŭnikaŭ padatkovych orhanaŭ pravam składańnia pratakołaŭ ab administracyjnych pravaparušeńniach pa hetym artykule, razhlad ža takich spraŭ treba ŭskłaści na sudździaŭ rajonnych i haradskich sudoŭ.
«Zamacavańnie ŭ zakanadaŭstvie mier administracyjnaha prymusu, na dumku MUS, dazvoliła b efiektyŭna ŭpłyvać na asacyjałaŭ, jakija ŭchilajucca ad pracoŭnaj dziejnaści», — havorycca ŭ paviedamleńni MUS.
Tam nahadvajuć, što na terytoryi byłoha SSSR kaliści ŭžo isnavała sistema mier, jakija prymianialisia da takich hramadzian. A ŭkaz prezidyuma Viarchoŭnaha Savieta SSSR ad 4 maja 1961 hoda tak i nazyvaŭsia — «Ab uzmacnieńni baraćby z asobami (hultajami, darmajedami, parazitami), jakija ŭchilajucca ad karysnaj dla hramadstva pracy i viaduć antyhramadski parazityčny ład žyćcia». Kryminalnymi kodeksami sajuznych respublik ustanaŭlivałasia adkaznaść (u BSSR — art. 204) za badziažnictva abo žabravańnie abo viadzieńnie inšaha parazityčnaha ładu žyćcia z maksimalnym pakarańniem u vyhladzie pazbaŭleńnia voli terminam na hod.
«Ab viartańni da minułaha nie moža być i havorki, — kanstatuje Karaziej. — Kanstytucyjnaje prava hramadzianina na pracu — zusim nie abaviazak. Toj adkaznaści, jakaja kaliści była za darmajedstva, prosta nie budzie. Ź inšaha boku, davajcie zychodzić z realij našaha času i toj ža Kanstytucyi. Štohod dziaržavaj sa srodkaŭ respublikanskaha biudžetu finansujucca raschody na transpart, žyllova-kamunalnuju haspadarku, miedycynskuju dapamohu, sacyjalnuju palityku. Pry hetym u adpaviednaści z art. 56 hałoŭnaha zakona krainy hramadzianie abaviazany ŭdzielničać u finansavańni dziaržaŭnych raschodaŭ šlacham vypłaty dziaržaŭnych padatkaŭ, pošlin i inšych płaciažoŭ. Narešcie, analiz apieratyŭnaj abstanoŭki śviedčyć pra ŭstojlivy niehatyŭny ŭpłyŭ pracoŭnaj niezaniataści na stan pravaparadku. Zamacavańnie ž u zakanadaŭstvie mier administracyjnaha prymusu dazvolić prosta bolš efiektyŭna ŭpłyvać na tych, chto viadzie asacyjalny ład žyćcia, nie choča dumać nie tolki pra dziaržavu, ale i pra svaich blizkich».
U MUS adznačajuć, što ciapier zakanadaŭstvam nie vyznačana paniaćcie «darmajedstva». Hety termin, ličać u milicejskim viedamstvie, moža być prymienieny da hramadzian, jakija naŭmysna ŭchilajucca ad udziełu ŭ finansavańni dziaržaŭnych raschodaŭ šlacham niavypłaty dziaržaŭnych padatkaŭ, pošlin i inšych płaciažoŭ.
