Dla minskaj publiki papularny televiadučy apranuŭ strakaty pinžak z čornaj «babačkaj». Na rukach — hruvastkija piarścionki. Fota - Iryna Arachoŭskaja.
Čyrvonyja lilei na pinžaku spałučalisia z takoha ž koleru akularami i tuflami-łofierami. Apošnija, naturalna, biez škarpetak.
Svoj apovied jon dapaŭniaŭ fotazdymkami, u tym liku redkimi paštoŭkami z ułasnaj kalekcyi.
«Usio lepšaje adrazu»: hledačy rychtavalisia da sustrečy z maestra.
Staličnyja krasuni pryjšli pasłuchać Vasiljeva.
Alaksandr Vasiljeŭ sabraŭ amal poŭnuju zalu.
Prychilnicy vystrailisia ŭ čarhu, kab atrymać aŭtohraf ci ŭručyć kvietki Vasiljevu.
Alaksandr Vasiljeŭ raskazaŭ minčankam historyi bolš čym paŭsotni žančyn — baleryn, aktrys, śpiavačak, arystakratak, jakija ŭ svoj čas byli ŭzoram stylu. A viečna źziać udajecca adzinkam, jak Katryn Denioŭ ci Safi Łaren, jakija dahetul źjaŭlajucca na vokładkach časopisaŭ.
«Klenčycie bryljanty!»
Z kaho ž usio heta pačałosia? Adnoj ź pieršych «ikonaŭ» u pačatku XX stahodździa stała baleryna Klea de Mierod.
Jaje asinaja talija (48 santymietraŭ!) dy dalikatny tvaryk vabili i prezidentaŭ, i karaloŭ. Tyja adorvali žančynu jaje lubimymi kamianiami — bryljantami.
Niejak ŭ Klea spytali, pry jakich abstavinach mužčyny robiać takija kaštoŭnyja padarunki: padčas pieršaj sustrečy, na piku žarściaŭ ci padčas rastańnia? «Nie, tolki kali ja im załomvaju ruki», — adžartavałasia baleryna.
«Tamu vyprošvajcie bryljanty, darahija žančyny!» — reziumavaŭ Vasiljeŭ pad apładysmienty minskaj publiki.
Adnoj z kankurentak Klea była ispanskaja śpiavačka Karalina Atera. Jana addavała pieravahu smarahdam.
Hetyja žančyny ŭviali modu na tonkuju taliju, pyšnyja hrudzi, doŭhija vałasy, bujnyja kamiani i lehkadumny śmiech. Jany zaŭsiody byli miłymi, viasiołymi, mieli cudoŭny nastroj, ni na što nie skardzilisia. Taki byŭ etałon žanočaj pryhažości ŭ samym pačatku XX stahodździa.
Klea, darečy, pražyła 91 hod (pamierła ŭ 1966) i ŭ stałym vieku taksama vyhladała abajalna.
Bormašyna i novyja seks-simvały
U 1910-ja hady z raspaŭsiudam elektryčnaści źjaŭlajecca bormašyna. I zorki pačynajuć šyroka ŭśmichacca. Adnoj ź pieršych heta zrabiła francužanka Arlet Daržer.
I siońnia, ličyć Vasiljeŭ, vy nie možacie być stylovym, kali z zubami ŭ vas nie ŭsio ŭ paradku. Nie škadujcie hrošaj na stamatołaha!
Enihmatyčnaj ikonaj stylu 1910-ch stała miljanierka Łuiza Kazaci.
Jana zaŭsiody była atočanaja paetami i artystami. Markiza źbirała ekzatyčnych žyviołaŭ i šakavała vieniecyjancaŭ, špacyrujučy pa horadzie z hiepardami i źmiejami. Uviała ŭ modu ciomny hrym, padvodku vačej i chnu.
Ar-deko: moda na hieamietryju
U 1920-ch hadach zaradžajecca novy styl — ar-deko, jaki źmianiŭ płastyčnyja, kvietkavyja matyvy stylu madern. U modu prychodzić hieamietryčny siłuet.
Ikona taho času — aktrysa niamoha kino Asta Nilsen. Jana nie była chudzieńkaj, ale ŭmieła chavać heta z dapamohaj viertykalnych linij.
Žadajecie dobra vyhladać? Pamiatajcie, što viertykal zaŭsiody strajnić, haryzantal — paŭnić.
Epocha ar-deko lubiła «kvadratnyja» tvary. Dla hetaha treba było nasić čubok — jon stvaraje pramuju liniju, pryčosku «kare» i mieć šyrokija skivicy. Zorki tolki z takoj kanfihuracyjaj ličylisia pryhažuniami. Kare ŭviała vienhierskaja aktrysa Lija de Puci, maleńkaja, ź miciaciurnaj hałoŭkaj i vielmi fotahieničnaja.
Žančyna-vamp
Pieraboi z charčavańniem u časy Pieršaj suśvietnaj pryviali da taho, što žančyny stali našmat strajniejšymi. Jak Viera Chałodnaja, karaleva ekrana darevalucyjnaj Rasii. Jaje styl usim pryjšoŭsia daspadoby. Žančyny zamaŭlali sabie tufli z atłasnymi stužkami, palito z vysokim kaŭniarom, kapielušy «a-la Viera Chałodnaja».
Chałodnaja ŭvasablała admysłovy typaž — žančyna-vamp. Vamp — abaviazkova brunietka, ź ciomnymi paviekami. «Vamp pahladzić na mužčynu adnojčy — i jon jaje rab da skonu dzion», — žartuje Vasiljeŭ.
Fłepier: «žančyna-chłapuška»
Što značyć žančyna-fłepier (ad anhł. flapper — chłapuška)? Adna ź viersij — ich tak nazyvali, bo jany nasili hałošy i nie zašpilvali, inšaja — ad taho, što takija dziaŭčaty byli hučnymi, vybuchovymi.
Fłepierki vystupali za žanočuju emansipacyju: kiravali aŭto i samalotami, tančyli fakstroty, a z mužčynami dazvalali sabie takoje, ad čaho žachalisia ich viktaryjanskija mamy. Naprykład, zastavacca z mužčynam sam-nasam, biez kampańjonki.
Adnoj ź pieršych fłepierak była amierykanka Mej Miurej.
Styl fłepier pradyktavaŭ žančynam novy hrym z malusieńkim rotam, čyrvonaj kroplaj, našmat mienšym za svaje naturalnyja abrysy. Fłepier zaŭsiody pramaŭlała dziciačym hałaskom, nibyta joj 12 hod. Zaŭsiody była ŭ humory, tancavała, nasiła sukienki ź bisieru i bliskavak.
Fatalnaja błandzinka
Šviedka Hreta Harba ŭ 1930-ja pieraviarnuła ŭjaŭleńnie śvietu pra pryhažość. Usie raptam uzhadali, što ništo tak nie ŭpryhožvaje žančynu, jak pierakis vadarodu.
Vobraz Harba staŭ ikanapisnym dziakujučy novamu ampłua — femme fatale, fam fatal, rakavaja žančyna. «Rakavaja błandzinka — heta kali mužčyny pabačyli — i pamierli», — tłumačyć Vasiljeŭ.
Hreta była šyrakaplečaja (zajmałasia płavańniem). Pakolki ŭsie chacieli być jak jana, u modu ŭvajšli padplečyki.
Jaje znachodka — fatazdymki ź plača, jana zaŭsiody razvaročvałasia plačom da kamiery. U Hrety byŭ šyroki rot, i jana heta padkreślivała makijažam, što vyvieła z mody maleńkija rociki-«sardečki» fłepierak.
Kali Harba była fotahieničnaja ad pryrody, to inšaja top-błandzinka 1930-ch, Marlen Dzitrych, sama vykavała svoj vobraz. Marlen była pampuškaj, jakaja sieła na žorstkuju dyjetu. Jana navat vyrvała čatyry zuby, kab mieć «jamački» na ščokach.
Hreta i Marlen uviali ŭ modu zhorblenuju śpinu. Sutułavataść stała normaj u 30-ja hady. Plečy pavinny być na pieršym płanie, a kab hetaha dabicca, treba zhorbicca. Taksama pierhidrol, farbavanyja viejki, vialiki rot i novyja formy. Fam fatal — heta žančyna z šyrokimi ściohnami.
Vajna dyktuje modu
Vajna nie prajšła biasśledna dla śvietu mody. Źjaŭlajecca styl military z pahončykami, kišeniami, plečykami dy mietaličnymi huzikami. Padčas vajny błandzinki sastupili miesca brunietkam i rudym: basma i chna — samyja tannyja farbavalniki.
Narešcie, vajna skončyłasia. Mužčyny viarnulisia z frontu. Čaho jany chočuć? Seksu i stvareńnia siamji. U modu ŭvachodziać žančyny z pyšnymi formami, poŭnymi vusnami i nakładnymi viejkami. Jak Ryta Chiejvart, zorka Halivuda 1940-ch hadoŭ.
Novaja seksualnaść
Špilki, jakija źjavilisia paśla vajny, pavinny byli simvalizavać novuju seksualnaść, raniej niedasiažnuju. Čamu ich nielha było stvaryć raniej? U vyrabie špilek stali vykarystoŭvać stalnyja štyry, jakija raniej byli praduhledžany dla avijakanstrukcyj.
Madeljer Kryścijan Dyjor stvaraje novy vobraz — pyšnyja spadnicy, baska (šyrokaja aborka, jakuju pryšyvajuć na liniju talii da sukienki, błuzki) i kapialuš «jadzierny hryb». Usie sukienki taho času robiać z drapiravanym biustam. Hrudzi treba było ŭsialak padkreślivać.
Simvał novaj seksualnaści — pyšnahrudaja błandzinka Merylin Manro. Darečy, jaje biust nie byŭ takim užo i pyšnym, zapeŭnivaje Vasiljeŭ. Jana vizualna pavialičvała jaho z dapamohaj vatnych nakładak, jakija pryšyvała da kožnaj sukienki.
Kankurencyju ź Mierylin vytrymlivała tolki Brydžyt Bardo, jakaja słaviłasia talijaj u 50 santymietraŭ i šykoŭnymi vałasami.
Špijonamanija
Z prychodam chałodnaj vajny i stvareńniem filmaŭ pra Džejmsa Bonda ŭ modu prasočvajecca vobraz špijonki. Śvietłaja pamada, cieni, vałasy, chałodny biazdušny vobraz. Kali ŭ 1950-ja žančyna ŭsim svaim źniešnim vyhladam kazała demabilizavanamu sałdatu: «Ja hatovaja ŭ łožak», dyk tut — «Ja hatovaja vas prašpijonić».
Prykład idealnaj špijonki — aktrysa češskaha pachodžańnia Kim Novak.
Epocha 60-ch znoŭ źmianiaje žanočuju fihuru, viartaje jaje ŭ davajenny čas. Žančyny chavajuć formy i robiać vyhlad, nibyta ŭ ich chłapiečaja fihura.
Pieraličvać krasuniaŭ paślavajennaha času i da našych dzion možna doŭha. Heta i talenavityja Odry Chepbiern, Hrejs Kieli, Liz Tejłar, Safi Łaren, Maryna Uładzi, Katryn Denioŭ. Apošniaja, pa słovach Vasiljeva, uzor taho, jak pravilna stareć i pry hetym zastavacca stylovaj.
«Nie treba bajacca stareć. Nichto nie małady paśla 40 hod, nielha być viečna maładym. A mužčyny lubiać roznych žančyn», — kaža Vasiljeŭ.
«Być žančynaj tak cudoŭna! U vas jość kaśmietyčka, duchi, vałasy roznaha koleru, makijaž, manikiur, bižuteryja, juvielirnyja ŭpryhožańni, sukienki, abcasy… Jak nie być pryhažuniaj! Adzinaja reč, jakaja moža pieraškodzić rabić heta, — lanota».
Parady ad fatalnych žančyn
«Ciahnicie nasok, žančyny! — vučyć Vasiljeŭ, pakazvajuć fotazdymki 1930-ch. — I vy zaŭsiody budziecie vyhladać zhrabnymi i pryhožymi. Nikoli nie staŭcie nahu kačarhoj. Jak tolki vy jaje sahnuli, vy zhubili 30 santymietraŭ rostu».
Jašče adna praktyčnaja parada, naviejanaja Harba:
elehantnaja žančyna nikoli nie nosić trykataž u abciažku. Jak tolki vy ŭ takoj sukiency, vy «pad abstrełam». Usie bačać «katletki» i «pirožnyja», jakija vy źjeli.
Dumajcie, na jakim fonie vy fatahrafujeciesia i ŭ što apranutyja. Čornaja sukienka na čornym fonie zrobić z vas «strajniašku».
Nikoli nie siadajcie na kresła ŭsioj «piataj kropkaj». Siadźcie napałovu, pakładzicie nohi pa dyjahanali, i vy vizualna zhubicie 20 kiłahramaŭ. Možna zahadzia patreniravacca. Hałoŭnaje — kab heta vyhladała niazmušana.
«Źmianiajciesia i nie zastavajciesia ŭ vobrazie taho hoda, kali vy paznajomilisia sa svaim mužam», — raić Vasiljeŭ.
Hladzicie taksama: Alaksandr Vasiljeŭ na kancercie ŭ Minsku zastupiŭsia za Kančytu Vurst
