Pačaŭsia pryjom zajavak na ŭdzieł u čaćviortym konkursie fashion-žurnalistaŭ i błohieraŭ Fashion Blog Competition, jaki projdzie ŭ miežach siomaha siezona Belarus fashion week.
Jak paviedamlaje pres-słužba BFW, achvotnym uziać udzieł u konkursie nieabchodna da 10 kastryčnika adpravić na elektronny adras [email protected] zajaŭku z ukazańniem proźvišča, imia, imia pa baćku, kantaktnaj infarmacyi, a taksama danych ab vopycie kankursanta u viadzieńni błoha ci napisańni žurnalisckich materyjałaŭ na temu mody.
«Konkurs daje mahčymaść naviedvać pakazy Belarus Fashion Week, farmiravać ułasnaje ŭjaŭleńnie ab tym, što saboj ujaŭlaje biełaruskaja moda i ŭ jaki bok jana raźvivajecca, dzialicca ŭražańniami pra ŭbačanaje, a taksama adsočvać modnyja tendencyi, suśvietnyja i łakalnyja trendy», — zaznačajuć arhanizatary.
Pieramožcy konkursu buduć vyznačanyja ŭ troch naminacyjach. U naminacyi Street Look BFW pieramoža ŭdzielnik, pryznany lepšym u aśviatleńni vuličnaj mody i adzieńnia haściej siomaha siezona Belarus Fashion Week. U naminacyi Fashion Blogger BFW žury vybiera lepšaha błohiera konkursu, jaki atrymaje mahčymaść stać hanarovym hościem adnaho ź viadomych Tydniaŭ mody. Aprača taho, u čas konkursu budzie vyznačany lepšy błohier pavodle viersii partniora konkursu — kampanii velcom.
Jak zaznačaje pres-słužba BFW, žury budzie ŭličvać u pracy kankursantaŭ abjektyŭnaje aśviatleńnie pakazaŭ i mierapryjemstvaŭ Belarus Fashion Week, vykarystańnie prafiesijnaj leksiki modnaj industryi, rehularnaje abnaŭleńnie błohaŭ i pracu ŭ sacyjalnych sietkach.
Siomy siezon Belarus fashion week projdzie ŭ Minsku z 5 pa 10 listapada i budzie pryśviečany viasieńniaj i letniaj modzie 2014 hoda.
