Напярэдадні святочнага канцэрта, які адбудзецца 7 студзеня ў мінскім Палацы культуры імя Шарко, Зміцер Вайцюшкевіч разам з гуртом РСП прэзентаваў новую калядную песню на вершы Уладзіміра Някляева. Кампазіцыя атрымала назву «Валёначак святога Мікалая».
«Кожны год мы з паэтам Уладзімірам Някляевым робім музычны падарунак нашым слухачам у выглядзе каляднай песні. Гэтым годам мне падалося, што яна павінна прагучаць з такімі партугальскімі ці кубінскімі матывамі, у стыле сальса ці фа́ду. Таксама захацелася сумясціць сваю сур’ёзнасць з троху гумарыстычным вобразам гурта РСП, з чаго і атрымаўся такі дуэт», — распавёў Зміцер.
Рэжысёр кліпа — Сяргей Торбік. Каманда таксама дзякуе Тяццяне Сініцвай за прастору для здымак.
Канцэрт 7 студзеня пад назвай «На Каляды» працягне традыцыю святочных лірычных імпрэзаў для ўсёй сям’і. У адным адзяленні прагучаць тэматычныя святочныя кампазіцыі, у другім — найлепшыя песні з розных альбомаў. На змест другога аддзялення можа паўплываць кожны слухач, пакінуўшы заяўкі ў сацыяльных сетках спевака.
