Napiaredadni śviatočnaha kancerta, jaki adbudziecca 7 studzienia ŭ minskim Pałacy kultury imia Šarko, Źmicier Vajciuškievič razam z hurtom RSP prezientavaŭ novuju kaladnuju pieśniu na vieršy Uładzimira Niaklajeva. Kampazicyja atrymała nazvu «Valonačak śviatoha Mikałaja».
«Kožny hod my z paetam Uładzimiram Niaklajevym robim muzyčny padarunak našym słuchačam u vyhladzie kaladnaj pieśni. Hetym hodam mnie padałosia, što jana pavinna prahučać z takimi partuhalskimi ci kubinskimi matyvami, u style salsa ci fádu. Taksama zachaciełasia sumiaścić svaju surjoznaść z trochu humarystyčnym vobrazam hurta RSP, z čaho i atrymaŭsia taki duet», — raspavioŭ Źmicier.
Režysior klipa — Siarhiej Torbik. Kamanda taksama dziakuje Tiaćcianie Sinicvaj za prastoru dla zdymak.
Kancert 7 studzienia pad nazvaj «Na Kalady» praciahnie tradycyju śviatočnych liryčnych imprezaŭ dla ŭsioj siamji. U adnym adzialeńni prahučać tematyčnyja śviatočnyja kampazicyi, u druhim — najlepšyja pieśni z roznych albomaŭ. Na źmiest druhoha adździaleńnia moža paŭpłyvać kožny słuchač, pakinuŭšy zajaŭki ŭ sacyjalnych sietkach śpievaka.