Валерый і Вераніка Цапкалы
«Грамадзянін, здзейсніўшы карупцыйныя злачынствы і маючы намер сысці ад адказнасці, у 2020 годзе здзейсніў адчужэнне названага жылога дома на карысць лізінгавай кампаніі на падставе дамовы куплі-продажу за 280 тыс. рублёў, у той час як рэальны кошт маёмасці складаў каля 3 млн рублёў. Пасля па дамове фінансавай арэнды, заключанай на 20 гадоў, гэты аб'ект нерухомасці быў дадзены лізінгавай кампаніяй адказчыку і членам яго сям'і ў карыстанне», — паведамляе пракуратура Мінска.
У пракуратуры палічылі, што мужчына гэтым самым спрабаваў схаваць нерухомасць ад канфіскацыі ў даход дзяржавы.
Таксама паведамляецца, што раней мінчука асудзілі па іншай справе «за атрыманне хабараў у асабліва буйным памеры, а таксама злачынствы экстрэмісцкай скіраванасці».
«З абвінавачанага на карысць дзяржавы спагнаны даход, атрыманы злачынным шляхам, у суме звыш 2 млн рублёў, — сцвярджае пракуратура Мінска. — Адным з прадметаў хабару з'яўлялася аказанне выгод маёмаснага характару ў выглядзе выканання работ па будаўніцтве для адказчыка жылога дома ў Мінску».
І ў першым, і ў другім выпадках гаворка ідзе пра адзін і той жа дом. Па ўсёй бачнасці, пракуратура паведамляла пра дом сям'і Валерыя і Веранікі Цапкалаў. Раней стала вядома, што ў сакавіку 2020 года іх нерухомасць па дамове куплі-продажу перайшла ва ўласнасць лізінгавай кампаніі «Райфайзэн-лізінг».
7 красавіка 2023 года ў Мінску Валерыю Цапкалу абвясцілі завочны прысуд — 17 гадоў пазбаўлення волі ў калоніі ўзмоцненага рэжыму. Адно з абвінавачванняў было ў тым, што Валерый Цапкала атрымліваў хабар яшчэ і за тое, што забяспечваў аплату выкананых будаўнічых работ: нібыта яму зрабілі праектна-вышукальныя работы для будаўніцтва яго прыватнага дома на суму больш за 25 тысяч рублёў, а таксама аплачвалі Валерыю, членам яго сям'і і блізкім сваякам адпачынак у Крыме.
У пачатку чэрвеня 2022 года дом Валерыя Цапкалы сілавікі паказальна разграмілі.
Чытайце таксама:
Кватэру Цапкалаў зноў выставілі на таргі, істотна скінуўшы цану
Мінскую кватэру Цапкалаў прадаваць не будуць
На аўкцыён выставілі мінскую кватэру Валерыя Цапкалы
«Цапкала меў шанцы стаць значнай персонай у гісторыі Беларусі. Але жыве ў ідэалагемах рускага свету»
