Калаж: «Наша Ніва»
Прайшоў амаль тыдзень з моманту ўварвання палесцінскага руху ХАМАС у Ізраіль. У адказ на гэта ізраільскія ўлады абвясцілі ХАМАС вайну і пачалі праводзіць беспрэцэдэнтныя па інтэнсіўнасці бамбёжкі сектара Газа.
Гэтыя падзеі прыцягнулі ўвагу ўсяго свету і многія краіны ўжо паспелі аб'явіць аб падтрымцы таго ці іншага бакоў канфлікту. Захад і беларускія дэмакратычныя сілы адкрыта падтрымалі Ізраіль, а Іран і некаторыя арабскія дзяржавы падтрымалі ХАМАС.
Намеснік старшыні рады бяспекі Расіі Дзмітрый Мядзведзеў у першы ж дзень нападу ХАМАС абвінаваціў ва ўсім ЗША, бо «гэтыя паўдуркі замест урэгулявання палесцінска-ізраільскага канфлікту адразу палезлі к нам і дапамагаюць неанацыстам».
Потым у сваёй звыклай манеры Мядзведзеў пажадаў амерыканцам грамадзянскай вайны.
Пры гэтым расійская прапаганда (разам з беларускай) смакавала поспехі ХАМАС і кпіла са «слабых габрэяў». Баевікоў ХАМАС спачатку хвалілі і нават імі захапляліся, але пасля сталі называць «жывёламі» і здзіўляліся іх жорсткасці.
На выразна антыізраільскі характар гэтай прапаганды звярнулі ўвагу ізраільскія СМІ.
Апошнія дні сфарміраваўся і новы прапагандысцкі наратыў, быццам паводзіны Расіі ва Украіне нішто ў параўнанні з дзеяннямі ХАМАС і Ізраіля і таму не варта нікому скардзіцца на метады вядзення вайны супраць украінцаў.
«Расія вядзе самы акуратны канфлікт за ўсю гісторыю чалавецтва»
У вайне ў Ізраілі прапаганда ўбачыла магчымасць выглядаць лепш на фоне зверстваў ХАМАС і акцый адплаты з боку ЦАХАЛ.
У адзіным парыве Z-прапагандысты сталі сцвярджаць, што, у адрозненне ад ХАМАС і ЦАХАЛ, расійская армія ва Украіне не руйнуе гарадоў, не расстрэльвае і не катуе цывільных, не абезгалоўлівае і не карае смерцю палонных вайскоўцаў, не наводзіць ракет на грамадзянскія аб'екты, не крадзе і не забівае чужых дзяцей і гэтак далей.
Галоўнай прычынай таму называецца «дабрыня, акуратнасць, высакароднасць, гонар, інтэлігентнасць і гуманнасць рускіх людзей».
«Расія вядзе самы акуратны канфлікт за ўсю гісторыю чалавецтва. Рускія салдаты на фоне астатніх — гэта рэальна воіны святла, высакароднасці і гонару», — напісаў у сябе ў акаўнце заснавальнік расійскага радыкальнага руху «Мужчынская дзяржава» Уладзіслаў Пазнякоў, каментуючы вайну ў Ізраілі.
«Пакуль арабы рэжуць галовы габрэям, а тыя сціраюць у пыл Газу, добрыя расейцы ставяцца да хахлоў занадта інтэлігентна і гуманна. Ім вельмі пашанцавала, інакш іх целы без галоў даўно б ляжалі пасярод руін таго, што некалі называлася Украінай», — піша неназваны былы вагнеравец з канала Alex Parker Returns.
«Гэта бясконцае замкнёнае кола гвалту. Дзякуй богу, мы так не ўмеем. Я сотню разоў бачыў у штабах і групах спецназа, як нашыя атакі адмяняліся, толькі каб цывільныя пад удар не трапілі», — разважае Z-ваенкар Яўген Паддубны.
У той жа час кіраўніца прапагандысцкага агенцтва Russia Today Маргарыта Сіманьян абурылася заявамі міністра абароны Ізраіля, які назваў радыкальных палесцінцаў «чалавечымі жывёламі». На яе думку, гэта жорстка і дурасць.
Але іншая рэч, калі гаворка заходзіць аб украінцах, якіх у сваім канале яшчэ год таму Сіманьян назвала «нелюдзямі, вырусямі і людаедамі».
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»Чытайце таксама:
Беларуская прапаганда ўкінула ідэю, што ізраільцянаў хочуць перасяліць ва Украіну
