У Беластоку запрацавала беларуская школа. У яе запісалася больш за 40 дзяцей 6

Твор вучаніцы беларускай школы ў Беластоку

Беларуская школа ў Беластоку — гэта філіял Беларускай школы ў Варшаве. Яна больш вядомая як школа Алеся Лозкі.

Па словах загадчыка філіялу Алега Юрчыка, арганізаваць беларускае навучанне для дзяцей з сем’яў беларускіх эмігрантаў, большасць з якіх апынулася на чужыне з-за пераследу на радзіме, было няпроста.

Польскае заканадаўства дазваляе праводзіць такія заняткі ў школах толькі для прадстаўнікоў нацыянальных меншасцяў з польскім грамадзянствам.

Цягам трох гадоў рупліўцы беларускамоўнага школьніцтва ў Беластоку шукалі выйсця з няпростай прававой сітуацыі і былі ўсцешаныя прапановай Алеся Лозкі супрацоўнічаць з яго школай у якасці філіялу.

Беластоцкі філіял працуе як школа выхаднога дня. Заняткі праводзяцца ў суботы для вучняў 1-4 класаў. Дзве гадзіны адведзена на вывучэнне беларускай мовы і літаратуры. Чацверакласнікі гадзіну будуць яшчэ праходзіць курс «Чалавек і свет».

Заняткі ў беларускай школе Беластока

Ахвотных вучыцца па-беларуску ў Беластоку збіралі анкетаваннем.

Былі заяўкі на навучанне ў беларускай школе і ад бацькоў, чые дзеці ходзяць у старэйшыя класы, але з іх пакуль не ўдалося сабраць груп, прызнаецца Юрчык. Ён спадзяецца, што на наступны год класаў будзе больш.

Усяго ў школу запісалася больш за 40 дзетак. У першы дзень, 2 верасня, на заняткі прыйшлі каля дваццаці.

«Дзеці 5 дзён на тыдзень ходзяць у польскія школы, а ў суботу будуць прыходзіць да нас, каб не толькі размаўляць і вучыцца па-беларуску, але і каб пазнаёміцца са сваімі беларускімі аднагодкамі. Будзем спадзявацца, што дзякуючы нашай школе яны пасябруюць на ўсё жыццё. Сярод нашых задач захаваць і пашырыць беларускамоўнае асяроддзе», — тлумачыць Алег Юрчык.

Адзін з бацькоў адзначыў, што беларусы павінны ведаць беларускую мову нават на чужыне, бо нацыянальная мова — гэта тое, што адрознівае іх ад іншых.

«Тут вельмі шмат беларускіх дзяцей і для іх важнае беларускамоўнае асяроддзе. Дзеці павінны ведаць, што беларусы гавораць па-беларуску, — кажа ён. — Сам я з Мінска і там зусім не чуў беларускай мовы. У мяне не было беларускамоўнага асяроддзя. Мой сын цяпер упэўнены, што людзі ў свеце гавораць па-беларуску, і яму гэта трэба».

Алег Юрчык

У беларускай школе працуюць чатыры настаўнікі, якія зацікаўленыя, каб беларускія дзеці вучыліся па-беларуску і размаўлялі па-беларуску, запэўнівае Алег Юрчык. Сам ён будзе выкладаць беларускім дзецям курс «Чалавек і свет».

Па яго словах, з адкрыццём школы былі фінансавыя пытанні, якія не дазволілі ажыццявіць тое, што задумвалася першапачаткова. Існуюць праблемы з падручнікамі і іншымі школьнымі дапаможнікамі. Але гэтыя перашкоды пераадольныя, кажа Юрчык.

Заняткі ў беларускай школе праходзяць у беластоцкім цэнтры грамадскай актыўнасці на вуліцы Святога Роха, 3. Гэты асяродак абсталяваны ўсім неабходным для навучання.

Такія ж філіялы, як у Беластоку, з'явіліся сёлета ў Гданьску і Кракаве.

Глядзіце таксама:

«26 тысяч беларусаў вучацца ў польскіх школах. Ці будуць яны адчуваць у сабе беларускую ідэнтычнасць?»

У Магілёве пайшлі вучыцца ў беларускамоўны клас толькі пяць першакласнікаў

Беларуская анлайн-школа ва Украіне напярэдадні навучальнага года распавяла, што ў іх адбываецца

Якія прыватныя школы цяпер працуюць і колькі там каштуе навучанне

Сабраць дзіця ў школу: цэны параўноўваюць бацькі ў Беларусі, Літве і Польшчы

Дэпутат Марзалюк выказаўся за пазітыўную дыскрымінацыю на карысць беларускай мовы. У часткі лукашыстаў палыхае

Васіль Вашчыла

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ