Затрымалі яшчэ аднаго супрацоўніка «Белгіпразема» — начальніка аддзела
Тэлеграм-канал ГУБАЗіКа паведаміў, што затрымалі начальніка аддзела прававой, кадравай і арганізацыйнай работы рэспубліканскага прадпрыемства «Праектны інстытут Белгіпразем». На сайце ўстановы начальнікам гэтага аддзела пазначаны Аляксандр Савін, піша «Люстэрка».
Скрыншот з відэа
Сілавікі прымусілі мужчыну вымавіць на камеру словы пра тое, што ён назіраў за акцыямі пратэсту, здымаў тое, што адбываецца і спачуваў пратэстоўцам, а таксама зарэгістраваўся ў плане «Перамога» і быў падпісаны на «дэструктыўныя» тэлеграм-каналы.
У подпісе да відэа губазікаўцы зноў робяць акцэнт на заробках затрыманых. Па іх логіцы, добрая аплата працы — гэта падстава для таго, каб маўчаць.
Раней на «Белгіпраземе» арыштам і звальненням падвергліся не менш за дзесяць чалавек.