Гуркі соляць у расоле з наборам спецый. Звычайна гэта кроп, лісце хрэну, дуба, парэчак і вішні, а таксама часнок. Фота: Наша Ніва
Маласольныя агуркі па спосабе прыгатавання нічым не адрозніваюцца ад марынаваных ці салёных агуркоў, але іх ядуць праз кароткі прамежак часу. Дзякуючы гэтаму ў іх больш вітамінаў і менш солі.
Расол робіцца такім жа чынам: бярэцца аналагічны набор спецый і такая ж колькасць солі. Гэтыя дзве разнавіднасці адрозніваюцца толькі працягласцю перыяду закісання і смакам. Маласольныя агуркі гатовыя да ўжывання праз дзень-два-тры. Чакаць салёных прыходзіцца ад тыдня да дзесяці дзён.
Маласольныя агуркі — крыніца натуральных прабіётыкаў, або, як яшчэ іх называюць, «добрых бактэрый». Яны станоўча ўплываюць на страваванне і засваяльнасць ежы, а таксама на імунную сістэму арганізма, бо дапамагаюць змагацца з рознымі відамі вірусных інфекцый, дыярэяй і харчовай алергіяй.
Каб прыгатаваць традыцыйныя маласольныя агуркі, вам спатрэбіцца:
- 1,5 кг свежых грунтавых агуркоў, невялікіх, са скуркай без пашкоджанняў,
- малая галоўка або палова вялікай галоўкі свежага часнаку,
- некалькі галінак кропу,
- трохі кораня хрэну і / або некалькі лістоў,
- 2 сталовыя лыжкі солі,
- 2 літры вады.
У 5-літровы кантэйнер лёгка змяшчаецца 1,5 кг агуркоў. Вы можаце выкарыстоўваць вялікі слоік, гаршчок або керамічную бочку.
Паміж агуркамі пакладзіце хрэн і спецыі.
Закіпяціце ваду, растварыце ў ёй соль, астудзіце і заліце агуркі.
Агуркі трэба прыціснуць гнётам, каб яны не вытыркаліся з расолу.
Мінімальны час салення — дзень-два. Першыя суткі гуркі трымаюць пры пакаёвай тэмпературы, каб паветра даходзіла да расолу (каб пасудзіна была ненакрытая ці прыкрытая марляй).
Ёсць спосаб прыгатаваць маласольныя агуркі больш хутка — гэта так званыя агуркі, прыгатаваныя «насуха». Трэба пакласці іх у цэлафанавы пакет, дадаць спецыі, пасыпаць соллю, добра страсянуць пакет, каб усе складнікі як след перамяшаліся, а потым пакласці ў халадзільнік прыкладна на восем гадзін. Гатова!
Што яшчэ можна дадаць для смаку
Акрамя вады, солі, кропу, якія паўтараюцца амаль у кожным рэцэпце, пры гатаванні маласольных агуркоў можна эксперыментаваць з іншымі дадаткамі, якія паляпшаюць і змяняюць смак.
Лаўровы ліст, перац, гарчыца, лісце дуба і парэчак, вінаграду і вішні, чабор, базілік, цукар, мёд, грэцкія арэхі ― усё залежыць ад таго, што вы любіце.
Вось яшчэ два рэцэпты са смакавымі варыяцыямі.
Маласольныя агуркі з лісцем чорных парэчак
- 1 літр гарачай вады
- 2 сталовыя лыжкі солі
- 2 кг свежых агуркоў
- 1 пучок свежага кропу
- 5 зубчыкаў часнаку
- 4 лісты чорных парэчак
Старанна вымыйце агуркі. Пакладзіце пучок кропу на дно глінянага гаршка або слоіка. Выкладзіце ў ёмістасць агуркі. Ачысціце зубчыкі часнаку і таксама пакладзіце іх у слоік. Лісце парэчак вымыйце і пакладзіце да агуркоў. Закіпяціце ваду і дадайце соль. Змяшайце да растварэння солі і адразу ж залівайце агуркі. Накрыйце і пакіньце да наступнага дня.
Маласольныя агуркі з лісцем дуба або вішні
Складнікі на літровы слоік:
- каля 500 г агуркоў,
- 1 літр кіпячонай вады,
- 1 сталовая лыжка солі з невялікай горкай (пажадана каменнай, не ёдаванай),
- 1 ліст хрэну,
- 2-3 вялікія зубчыкі часнаку,
- 3-4 галінкі кропу (чым больш, тым лепшы водар),
- кавалачак кораня хрэну — прыкладна 3-4 см,
- вішнёвае ці дубовае лісце.
Аўтарка рэцэпта раіць на літр вады класці 1 сталовую лыжку солі з невялікай горкай, а на літровы слоік выкарыстоўваць каля 500 мл расолу.
Як гатаваць:
- Закіпяціце 1 літр вады і дадайце 1 сталовую лыжку солі з горкай. Старанна перамяшайце і астудзіце (у момант, калі вы заліваеце агуркі, вада можа быць ледзь цёплай).
- Старанна вымыйце агуркі, кроп і хрэн. Нарэжце хрэн на некалькі больш дробных частак (напрыклад, на чатыры). Ачысціце часнок і падзяліце яго на зубчыкі. Акуратна раздушыце кожны зубчык часнаку, прыціснуўшы яго тупым бокам нажа да стальніцы.
- Агуркі можна спакаваць у вялікі слоік, керамічны посуд або ў некалькі слоікаў. Для салення «тут і цяпер» — г. зн. у выпадку маласольных агуркоў — лепш за ўсё падыходзіць керамічны посуд.
- На самае дно слоіка пакладзіце ліст і кавалачак хрэну, частку кропу, зубчык часнаку.
- Досыць шчыльна выкладзіце агуркі ў слоік, пажадана ў вертыкальным становішчы. Пакінуты часнок, хрэн і кроп запхніце паміж агуркамі.
- Заліце агуркі папярэдне прыгатаванай ледзь цёплай вадой з соллю, яны павінны быць цалкам пакрытыя. Калі вы робіце агуркі ў слоіку, досыць шчыльна іх укладзіце і накрыйце слоік накрыўкай або марляй (павінен быць доступ паветра, таму шчыльна не закрывайце).
- Агуркі трэба схаваць ад сонца (бо інакш яны згніюць, а не прасоляцца). Прыкладна праз 2-3 дні яны будуць гатовыя да ўжывання — вада памутнее. Кожны наступны дзень будзе рабіць маласольныя агуркі больш салёнымі.
Больш пра ежу:
Шэсць салатаў з агурком: ад знаёмых да нечаканых
Як скласці летні рацыён? Разбіраем міфы і правілы
Бамбл-кава — сапраўдны летні хіт. Асцярожна, гэты напой можа стаць вашым улюбёным
а можа ў вас і агурок такі ж...?