Марына Адамовіч і Мікалай Статкевіч у жніўні 2015 года. Статкевіч толькі вызваліўся з турмы, дзе быў са снежня 2010 года
«1030 дзён за кратамі. 75 дзён невядомасці», — напісала ўчора Марына Адамовіч пра свайго мужа Мікалая Статкевіча. Два з паловай месяцы пра яе мужа няма звестак.
Жонка палітвязня раней пісала, што не толькі не атрымлівае лістоў ад Статкевіча, але і не мае адказаў ад афіцыйных інстанцый, куды яна таксама дасылае звароты.
«Верагодна, адзіны «закон», які дзейнічае, гэта — «иногда не до законов». Апошнія сілы сыходзяць не на тое, каб жыць, а на тое, каб не клясці. Яны самі з гэтым справяцца. Усё мінае, а душа бессмяротная. Пакуль я пра гэта памятаю. Але вельмі цяжка», — пісала яна.
Мікалая Статкевіча затрымалі 31 мая 2020 года, за два месяцы да прэзідэнцкіх выбараў. У снежні 2021 года яго асудзілі на 14 гадоў пазбаўлення волі ва ўмовах узмоцненага рэжыму, тэрмін ён адбывае ў глыбоцкай калоніі ў адзіночнай камеры. Палітыку 66 гадоў.
Таксама доўгі час няма звестак пра Ігара Лосіка, Максіма Знака, Віктара Бабарыку.
Чытайце таксама:
Падобна, што Статкевіч, Знак і Лосік працяглы час знаходзяцца ў ШІЗА — праваабаронцы
Сваякі Дзяніса Івашына атрымліваюць пагрозы за інфармацыю пра палітзняволенага
У навукоўца Ігара Бортніка за кратамі значна пагоршыўся стан здароўя
