Чатыры незвычайныя рэцэпты, якія не дадуць прапасці вішням пад канец сезону 3

Вішні — не толькі смачныя, але і вельмі каштоўныя ягады. Яны з'яўляюцца скарбніцай такіх вітамінаў, як С, А, Е і К, а таксама змяшчаюць фоліевую кіслату, калій, кальцый, жалеза, фосфар і магній. Таму іх варта есці не толькі летам.

Але як гэта зрабіць? Застаецца прыгатаваць з іх прысмакі, якія захаваюцца на доўгі час.

Марынаваныя вішні

Інгрэдыенты:

• Кілаграм цвёрдых, спелых вішань з чаранкамі,
• 3—4 сушаныя гваздзікі,
• духмяны перац,
• палова чайнай лыжкі насення гарчыцы,
• некалькі тонкіх лустачак імбіру,
• 250 мілілітраў белага віна,
• 100 мілілітраў белага віннага воцату,
• тры чвэрці шклянкі цукру,
• дзве сталовыя лыжкі мёду,
• чайная лыжка солі,
• чайная лыжка цёртай апельсінавай цэдры.

Гатаванне:

1. Вымыйце і высушыце вішні. Акуратна абрэжце чаранкі, але не выдаляйце іх цалкам.
2. Раскладзіце вішні ў чыстыя прапараныя слоікі.
3. Пакладзіце ўсе спецыі ў кожны слоік разам з імбірам.
4. Разліце па слоіках гарачы сіроп, прыгатаваны з віна, воцату, мёду, цукру, солі і апельсінавай цэдры. Для гэтага проста змяшайце іх у каструлі і давядзіце да кіпення.
5. Пасля шчыльна закруціце слоікі і кіпяціце іх у вадзе каля 20 хвілін у вялікай каструлі. Гэта іх прастэрылізуе.

Марынаваныя вішні можна есці прыкладна праз два тыдні.

Вішнёвы соус для барбекю

Інгрэдыенты:

• дзве сталовыя лыжкі аліўкавага алею,
• салодкая цыбуля, нарэзаная кубікамі,
• два зубкі часнаку, расціснутыя ў часночным прэсе,
• два кубкі цёмных вішань без костачак,
• кубак кетчупу,
• дзве траціны кубка карычневага цукру,
• траціна кубка бальзамічнага воцату,
• сталовая лыжка вустэрскага соусу, калі маеце пад рукой (можна замяніць бальзамічным воцатам),
• дзве чайныя лыжкі гарчыцы,
• палова чайнай лыжкі чорнага перцу.

Гатаванне:

1. Нагрэйце аліўкавы алей на сярэднім агні ў вялікі рондалі. Дадайце цыбулю і смажце каля пяці хвілін. Пасля дадайце часнок і трымайце на агні яшчэ хвіліну.
2. Дадайце вішні, кетчуп, цукар, бальзамічны воцат, вустэрскі соус і перац да цыбулі і часнаку. Давядзіце ўсе да кіпення. Цяпер паменшыце агонь і гатуйце каля дзесяці хвілін.
3. Змяшайце ўсё да стану пасты, якую пасля тушыце на павольным агні яшчэ 10 хвілін.

Вішнёвы канфіцюр

Інгрэдыенты:

• паўкіло вішань,
• кілаграм цукру,
• лімон,
• 50 мл вады.

Гатаванне:

1. Памыйце вішні і рукамі выцісніце з іх сок. Дадайце туды ваду з цукрам.
2. Давядзіце да кіпення, пастаянна памешваючы.
3. Дадайце плады вішань, з якіх вы выціснулі сок, і варыце на павольным агні каля паўгадзіны. Не забывайце пастаянна памешваць. Дайце сумесі астыць.
4. Пачакайце тры ці чатыры гадзіны, а пасля зноў варыце ўсё на працягу прыкладна 10 хвілін. Адстаўце сумесь на ноч.
5. Раніцай дадайце ў варэнне сок цэлага лімона. Зноў варыце, памешваючы, каля 25 хвілін.
6. Гарачы джэм раскладзіце ў слоікі і пастэрызуйце на працягу васьмі хвілін у шчыльна закрытых слоіках.

Вішнёвае варэнне

Інгрэдыенты:

• два кілаграмы вішань,
• сок чатырох лімонаў,
• цэдра двух лімонаў,
• тры кубкі цукру.

Гатаванне:

1. Прамыйце вішні і дастаньце з іх косткі, пасля разрэжце іх напалову. Нарэжце адну з паловаў на дробныя кавалачкі.
2. Пакладзіце вішні ў рондаль. Дадайце сок і цэдру лімонаў. Змяшайце ўсе і пастаўце рондаль на сярэдні агонь.
3. Калі вы ўбачыце, што вішні пусцілі сок, змяшайце ўсё і паменшыце агонь. Накрыйце рондаль і тушыце на працягу 20 хвілін.
4. Дадайце цукар і старанна ўсе змяшайце. Гатуйце яшчэ сем хвілін без накрыўкі.
5. Перакладзіце варэнне ў слоікі і пастэрызуйце каля 20 хвілін.

Nashaniva.com

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ