Vyjšła pieršaja biełaruskaja hulnia dla smartfonaŭ-androidaŭ a Vy hatovyja płacić za prahramy i hulni? 13

Ułaśniki mabilnych telefonaŭ i płanšetaŭ na bazie apieracyjnaj sistemy Android mohuć nabyć u anłajn-kramie pryładaŭ Google Play pieršuju biełaruskuju hulniu pad nazvaj PaperHell.

Heta słova možna pierakłaści jak «papiarovy čorcik».

«Prostaja i cikavaja hulnia ź intuityŭnym hiejmpłejem i jarkaj malavanaj hrafikaj! Źbirajcie ački i inšyja bonusy, ratujučysia ad padajučych źvierchu čyrvonych monstraŭ! Meta hulni — pratrymacca jak maha bolš i sabrać maksimum ačkoŭ. A kolki pratrymaješsia ty?» — napisana ŭ anatacyi. Kiravać čałaviečkam, namalavanym na arkušy sšytka, nieskładana.

Dastatkova nachilać mabilnik ci płanšet u roznyja baki i pieryjadyčna naciskać na ekran, kab hieroj padskokvaŭ ci, naadvarot, prysiadaŭ.

Mieniu, siarod inšych movaŭ, zroblenaje i pa-biełarusku. Hulniu raspracavała ajčynnaja art-studyja PRAS. Na ich rachunku ŭžo dźvie prahramy dla Androidaŭ. Adna ź ich — «Palivač», jaki dazvalaje padličyć svaje vydatki na biełaruskich zapraŭkach.

Za svaju ciapierašniuju navinku stvaralniki prosiać $1,01.

Chto, na ich dumku, budzie płacić hrošy za pryładu? «Hulniu my rabili najpierš dla katehoryi „amierykanski padletak 14-ci hadoŭ“. Takija ludzi nabyvajuć i buduć nabyvać hulni, — razvažaje dyrektar studyi PRAS Mikoła Tamaševič. — U Biełarusi, zrazumieła, mała ludziej zachoča kupić — my pryvykli da chalavy, choć košt składaje ŭsiaho tolki 9 tysiač rubloŭ. Faktyčna heta ŭsiaho košt adnoj harbaty ŭ kaviarni».

Čamu ž abrany taki niezvyčajny košt — krychu bolš za dalar? «My vyrašyli, što $0,99 budzie najlepšym varyjantam, bo psichałahična lepš adčuvajecca, ale krychu pamylilisia ŭ kursach i košt staŭ $1,01, — śmiajecca jon. —

My płanujem vypuścić i biaspłatnuju viersiju, ale pakul vyrašyli ŭsio ž pravieryć hipotezu adnoj harbaty».

Anłajn-kramy pryładaŭ dla telefonaŭ pierapoŭnienyja raznastajnymi prahramami, ale biełaruskich siarod ich nadzvyčaj mała. "Naša Niva" niekalki miesiacaŭ tamu ledź sabrała 12 karysnych pryładaŭ dla Androidaŭ. Hulniaŭ ža niama zusim. Ci źmienicca hetaja situacyja? «Rynak mabilnych hulniaŭ u Biełarusi raźvivajecca, ale pierśpiektyŭnym jaho nazvać ciažka, bo biełarusy mocna pryvykli da darmovaha. U nas možna chiba što zarablać na rekłamie, ale heta zusim nie vialikija hrošy.

Voś i atrymlivajecca, što našyja raspracoŭščyki pracujuć na jeŭrapiejskija i amierykanskija kampanii. Čakać hulniaŭ, aryjentavanych na Biełaruś, jak i kamiercyjnych mabilnych dadatkaŭ, u najbližejšy čas nie vypadaje», —

padsumoŭvaje Mikoła Tamaševič.

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH