Z 28 vieraśnia pa 7 kastryčnika pa ŭsim śviecie projdzie najbujniejšy fiestyval karotkaha mietra Manhattan Short Film Festival. 100 tysiač hledačoŭ u 300 haradach buduć abirać najlepšy karotkamietražny film. Biełarusy ŭdzielničajuć u im užo čaćviorty hod — z taho času, jak u Minsk Manchetenski fiestyval pryviezła dyrektarka kinateatra «Aŭtakino» Ała Kurkul.
Siarod 10 filmaŭ, što ŭdzielničajuć u fiestyvali, prysutničaje vaśmichvilinny brytanski film Babaka Anvary «Dva plus dva», jaki raskazvaje pra fienomien supracivu aŭtarytarnamu režymu. Film užo byŭ naminavany na premiju Bafta Film Awards jak najlepšy karotkamietražny film. Režysior filma daśleduje žadańnie ludziej kidać vyklik uładam despatyčnych krain.
«Ja pierakanany: takoje žadańnie prysutničaje ŭ hłybini dušy kožnaha z nas. Mianie zaŭždy cikaviŭ fienomien supracivu. Da jakoha času ludzi buduć siadzieć i zhadžacca z tym, što im dyktujuć? Padčas stvareńnia filma ja mieŭ na mecie pakazać biessensoŭnaść dyktatury ŭ aleharyčnaj maniery. Ludzi naradžajucca svabodnymi, i my budziem imknucca da spraviadlivaści pa ŭsim śviecie stolki, kolki budziem isnavać», — kaža režysior.
