U kramach Minska źjavilisia niezvyčajnyja suvieniry —
Častkova hrošy, vyručanyja ad prodažu takich suvieniraŭ, buduć nakiravany na dabračynnuju dapamohu. Udzieł u vytvorčaści puzyrystaj plonki prymajuć žychary Śpiecyjalnaha doma dla vieteranaŭ, sastarełych i invalidaŭ, što dazvalaje im nie tolki realizavać siabie, ale i atrymać za heta hrošy.
Razrezanuju na nievialičkija kavałački i simpatyčna ŭpakavanuju polietylenavuju plonku pa simvaličnaj canie ŭžo pačali pradavać u kramach.
Siońnia «polietylen z pazityvam» možna nabyć u CUMie, HUMie, handlovym domie «Kirmaš». U chutkim časie polietylenavuju puzyrystuju plonku možna budzie ŭbačyć i na pryłaŭkach inšych kram i, mahčyma, navat u kijoskach «Biełsajuzdruka».
— Samaje składanaje dla nas zaraz, — heta praca z tavaraznaŭcami, — raskazvaje aŭtar idei pradprymalnik Aleh, jaki ścipła nie pažadaŭ, kab jaho proźvišča zhadvali. — Davodzicca pracavać z kožnym asabista i tłumačyć niuansy. A heta adbiraje šmat času.
Novyja suvieniry, pierš za ŭsio, znojduć svajho pakupnika siarod dziaciej, padletkaŭ, studentaŭ i ofisnych pracaŭnikoŭ.
Łopańnie puzyrystaj plonki ličycca rełaksataram i antystresam.Kožny pakupnik atrymaje mahčymaść zaspakoicca i padniać sabie nastroj, ale pry hetym jašče i zrobić svoj układ u dapamohu ludziam, jakim jana patrebnaja.
Taksama pradprymalnik zaznačaje, što kali vytvorčaść budzie mieć pośpiech, to jość šmat idej dla raźvićcia hetaha prajekta, pačynajučy ad rasšyreńnia asartymientu pradukcyi da hieahrafičnaha achopu tych, kamu možna budzie dapamahčy takoj dziejnaściu.
