Sioleta nie stanie 128 škoł, pieravažna biełaruskamoŭnych

Pavodle Ministerstva adukacyi, sioleta buduć zakrytyja 128 małakamplektnych škoł u sielskaj miascovaści, jakija ŭ bolšaści źjaŭlajucca biełaruskamoŭnymi.

Kolki zastaniecca biełaruskich škoł, u viedamstvie pakul skazać nie mohuć, heta stanie viadoma tolki paśla 1 vieraśnia.

U Ministerstvie adukacyi taksama pakul nie majuć ličbaŭ, kolki vučniaŭ u hetym hodzie budzie vučycca na biełaruskaj movie.

Presavaja sakratarka Julija Vanina ličyć, što škoły i adździeły adukacyi nia musiać zajmacca infarmavańniem pra mahčymaść addać dziaciej u biełaruskamoŭnyja kłasy. Vybar movy navučańnia pavinien iści ź siamji, kaža Julija Vanina: «Možna, kaniečnie, prymusić, razmaŭlać pa-rasiejsku ci pa-biełarusku. Ale pakul u siamji nie buduć razmaŭlać pa-biełarusku, ničoha ž nie budzie. Pakul dzicia doma nie pačuje jakuju-niebudź movu, nie budzie jano na joj razmaŭlać. U mianie troje dzietak, jany viedajuć i rasiejskuju movu, i biełaruskuju. Im usio roŭna ŭvohule, na jakoj razmaŭlać».

Sioleta ŭ Minsku biełaruskamoŭnych vučniaŭ hatovyja pryniać piać himnazij i try siarednija škoły. Aprača hetaha kłasy na rodnaj movie hatovy adkryć siem staličnych škoł. Biełaruskamoŭnyja kłasy z adnym vučniem pracujuć u niekalkich rehijanalnych haradach.

Da Tavarystva biełaruskaj movy sioleta pa dapamohu ŭ adkryćci biełaruskamoŭnych kłasaŭ nichto z baćkoŭ nie źviartaŭsia. Pra heta raspaviała pieršaja namieśnica staršyni Alena Anisim. Jana raskazvaje, što rašeńnie vučycca pa-biełarusku siońnia źviazana sa šmatlikimi ciažkaściami. Naprykład, baćki buduć vymušany vazić svaich dziaciej u inšy kaniec horada. Pieraadoleć hetyja ciažkaści realna, kali zacikaŭlenyja mamy i taty abjadnoŭvajucca ŭ supolnaści:

«Kali baćki hurtujucca, kali jany razumiejuć, što jany nie adny, tady praściej i ŭładam dakazać, što prablema isnuje. Jak praviła, ułady ličać, što kali heta 1–2 čałavieki, — heta nie prablema. Niachaj prystasoŭvajucca da ŭsich astatnich. Kali źbirajecca dziasiatak ludziej, a to i bolš, tady jany musiać vyrašać hetuju prablemu».

Dva hady tamu prafiesar Aleś Astroŭski z Hrodna damohsia, kab jaho dzieci vučylisia pa-biełarusku. Dla treciakłaśnicy Śviety i druhakłaśnika Janki ŭ 32-j hrodzienskaj škole vykładajuć pa asobnaj prahramie. U biełaruskamoŭnaj adukacyi prafiesar bačyć tolki pieravahi i raić baćkam trymacca jahonaha prykładu: «Kali ŭ zvyčajnych kłasach pa 20–30 čałaviek, to tut 1–2 vučni. Jany mienš, čym za ŭrok, prachodziać materyjał. Kali nieasnoŭnyja, dadatkovyja pradmiety — fizkultura, vyjaŭlenčaje mastactva, śpievy, tancy — vykładajucca razam z kłasam, a hałoŭnyja pradmiety — piśmo, čytańnie, pryroda i śviet, matematyka — vyvučajuć asobna. Vychodzić, jany žyvuć paŭnavartasnym žyćciom školnika. Niama nijakich kompleksaŭ i prablem.

Biełaruskaja mova stvaraje stratehičnuju pieravahu, jakaja dazvalaje dzieciam atrymlivać značna lepšuju adukacyju».

Radyjo «Svaboda»

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH