Za što sieli Pussy Riot? 69

Drobnym chulihankam z «pank-hrupy Pussy Riot», jakija stancavali pasiarod Chrama Chrysta-Zbaŭcy ŭ Maskvie i vykłali videa hetaha na YouTube, rasijski sud daŭ dva hady turmy. Učynak, jaki ŭ zachodniaj miedyja-prastory pratrymaŭsia b na pieršych pałosach paru dzion, u Rasii zrabiŭsia ledź nie padziejaj hoda.

Pieršaje, estetyčnaje. Vielmi dziŭna čytać ludziej biez pačućcia humaru, jakija razvažajuć pra akcyju Pussy Riot jak pra mastacki pierformans.

Pra pank-hurt z takoj nazvaju da viadomaha incydentu ŭ Chramie Chrysta-Zbaŭcy ŭ Rasii nichto nie čuŭ.

Mnohija paśpieli na toj momant pačuć pra «Art-hrupu «Vajna» (členam jakoj ci to była, ci to jość adna z padsudnych aktyvistak Nadziežda Tałakońnikava), ale i tut, i tam razmova idzie nie pra muzyku i nie pra mastactva, ale prosta pra niedasiažna talenavityja i jaskravyja palityčnyja akcyi.

Słavuty vazok z hnojem, padviezieny Alesiem Puškinym da rezidencyi Łukašenki — heta taksama vybitnaja palityčnaja akcyja, ale ž taksama nijak nie mastactva. Adnak Puškin akramia hetaha maluje karciny i razmaloŭvaje cerkvy, u toj čas, jak majstry palitšou z «Vajny» ładziać tolki palityčnyja pierformansy.

Druhoje, nie varta idealizavać asudžanych. Heta nie prosta «maci małaletnich dziaciej» i nie «maładyja durnyja dzieŭki», ale daśviedčanyja i pazbaŭlenyja mnohich tarmazoŭ palitaktyvisty, jakija viedali, na što išli. Jany naŭrad ci mahli viedać, što skandał nabudzie status hałoŭnaha pracesu hoda i što prysud budzie nahetulki nieadekvatnym, ale dakładna viedali, što prosta tak im hetaha nie darujuć i što daviadziecca albo chavacca, albo siadzieć.

Druhoje-z-pałovaj, treba pamiatać, što

Pussy Riot — pradstaŭniki admarožanaj levaradykalnaj palityčnaj płyni.

Pra palityčnyja ideały hetych ludziej moža dać ujaŭleńnie «matyvacyjnaja» častka ichnaha małaapietytnaha (lepš nie chadzicie pa spasyłcy) reportu pra akcyju z kurycaj u pieciarburskim supiermarkiecie:

«Aktivisty Vojny — nie bł*di, oni ničieho nie prodajut i ničieho nie pokupajut i živut, nie tratia dienieh, to jesť „biezbł*dno“. Oni vsiačieski *but bł*dstviennuju rośsijskuju ekonomiku i rośsijskuju vłasť, uničtožajuŝuju russkij narod. Vsie, čto nužno Vojnie, aktivisty bierut biespłatno. Biespłatno = biezbł*dno. Živi biespłatno! Umri biezbł*dno! Eto formuła Vojny»

Heta nie intelihientny Navalny i jahonyja demakratyčnyja paplečniki ź liku «biełych kaŭniaroŭ». Heta maładziony-prykalisty, jakija robiać zabaŭnyja varjackija akcyi — ale kaho da ŭłady ja b nie chacieŭ puścić. Jak i ich idejnych paplečnic z Femen, čyj lidar Hanna Hucoł — adkrytaja marksistka i fieministka. Napiaredadni prysudu Pussy Riot aktyvistki Femen adznačylisia simvaličnaj akcyjaj: śpiłavali ŭ centry Kijeva kryž, jaki nie maje nijakaha dačynieńnia da RPC, ale ŭstalavany ŭ pamiać pra Aranžavuju revalucyju.

Moža heta byŭ i pralik, ale chutčej nahadvaje «abhavorku pavodle Frojda».

Treciaje, karotkaje. Niepaŭtorny vobraz sučasnaj pucinskaj Rasii — heta kali

ludzi, u čyich kabinietach visić partret bandyta Dziaržynskaha i chto dahetul nie pachavaŭ mumiju Ŭładzimira Lenina, sadžajuć u turmu levaradykalnych aktyvistak za śviatatactva.

Čaćviertaje, samaje padazronaje.

Heta, miž inšym, nie pieršy taki «kancert» z udziełam ludziej, blizkich da hetaj hrupoŭki. U 2009 hodzie «Art-hrupa «Vajna», u tym liku Tałakońnikava, zładzili «kancert» u pamiaškańni suda, dzie išoŭ praces nad arhanizataram ateistyčnaj vystavy. U 2010 hodzie ŭ tym ža sudzie jany raskidali try tysiačy madahaskarskich tarakanaŭ. Nichto tady zatrymany nie byŭ.

Najnoŭšy

skandał z Pussy Riot i tancami ŭ Chramie razhareŭsia ŭ toj samy momant, kali pačaŭ razhortvacca skandał vakoł pryvatnaj kvatery patryjarcha Kiryła.

Carkoŭnyja normy naŭprost nie dazvalajuć patryjarchu vałodać majomaściu, asabliva kvaterami ŭ elitnych maskoŭskich damach. Hetyja normy pahatoŭ zabaraniajuć jamu žanicca, ale tut uspłyvaje asoba Lidzii Lavonavaj, jakaja nabližana da patryjarcha jak minimum z kancu 90-ch hadoŭ i pražyvaje ŭ jahonaj kvatery. Byŭ taksama i skandał z hadzińnikam patryjarcha canoju ŭ niekalki dziasiatkaŭ tysiač dalaraŭ. Normy normami, ale ž chto pra heta ciapier pamiataje?

Nie budziem umiešvacca ŭ spravy Rasijskaj pravasłaŭnaj carkvy — chacia možna sabie ŭjavić, što ŭ niekatorych inšych cerkvach za hetymi rečami adstaŭka hijerarcha paśledvała b vokamhnienna. Ale tut za imi paśledavała sprava Pussy Riot.

Aleś Čajčyc

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH