Jašče paru hadoŭ tamu na pryłaŭkach biełaruskich kramaŭ stajali pieravažna zamiežnyja soki, pieradusim rasijskija i ŭkrainskija. U 2008 ajčynnyja mieli tolki 30% rynku.
Revalucyju zrabiła dziaržaŭnaja prahrama impartazamiaščeńnia.Administratyŭnyja mietady (naprykład, myta na ŭvoz sokavaha kancentratu ŭ 2009 stała nulavoj) razam z rynkavymi krokami (zhoda na prychod zamiežnych inviestaraŭ) stymulavali raźvićcio vytvorčaści ŭ Biełarusi.
Dla ludziej źmianiłasia mała što. Faktyčna jany spažyvali ŭsio toj samy kancentrat — najčaściej zaviezieny ź Izraila, — jaki ciapier, praŭda, razbaŭlaŭsia vadoj na terytoryi našaj krainy. Vyklučeńnie składajuć chiba što jabłyčny, tamatny, ślivavy i biarozavy soki, syravina dla jakich jość i ŭ Biełarusi.
U vyniku za studzień—maj 2012 hoda dola biełaruskich sokaŭ i niektaraŭ u prodažy dasiahnuła 80,1%. Rastuć i abjomy spažyvańnia. Za hod kožny biełarus u siarednim vypivaŭ pa 10 litraŭ soku.
«Staraja krepaść» (brendy «Sočny» i «Exotic»)
Najbujniejšym hulcom na rynku źjaŭlajecca babrujskaja «Staraja krepaść». Jaje ŭłaśnik —inviestycyjnaja kampanija Detroit Investments.Praŭda, amierykanskaja jana tolki pa miescy štab-kvatery. Jaje ŭłaśniki — rasijskija miljaniery Alaksandr Liŭšyc i Jaŭhien Kašpier, jakija ŭ siaredzinie 1990-ch stvaryli hetuju kampaniju dla inviestycyj u piŭny biznes.
Ź piva Detroit Investments pačała pracu i ŭ Biełarusi, kali na jaje hrošy ŭ Babrujsku ŭ 2004 hodzie była zapuščana vytvorčaść piva «Siabar». La vytokaŭ vytvorčaści stajaŭ biznesmien Siarhiej Levin — śpiecyjalist pa raskrutcy i dalejšym prodažy kampanij. Usiaho za hod pracy «Siabra» marka «Babroŭ» zaniała druhoje miesca ŭ krainie pa prodažach. U 2007 babrujskuju pivavarniu kupiŭ hałandski «Chajnekien», a Levin, Liŭšyc i Kašpier zanialisia ŭ hetym samym horadzie sokami, ukłaŭšy $20 miljonaŭ. Jašče $40 miljonaŭ dała Mižnarodnaja finansavaja karparacyja.
Utvoranaja imi «Staraja krepaść» vychodziła na rynak z napaleonaŭskimi płanami — vypuskać 70 miljonaŭ litraŭ soku za hod. Pośpiech byŭ dasiahnuty chutka.Vytvorčaść «Sočnaha» pačałasia viasnoj 2008, i ŭžo da kanca hoda jon staŭ samaj papularnaj sokavaj markaj u krainie. Spadabałasia biełaruskam i rekłama kampanii — daścipny chłopčyk Uład sa šklankaj «Sočnaha» ŭ rukach dva hady zapar pryznavaŭsia samym papularnym brend-vobrazam.
A Siarhiej Levin u kancy 2011 pakinuŭ «Staruju krepaść», jakaja kantralavała ŭžo bolš za 30% rynku, kab skancentravacca na nastupnym prajekcie — vytvorčaści pralnaha parašku «Mara».
«Koka-Koła» (Magic Summer, Rio, Joy; rasijskija Rich, «Dobry», «Maja siamja», «Da!» )
Karparacyja «Koła-Koła» trymaje druhoje miesca na rynku sokaŭ, zajmajučy kala 20%.«Naša Niva» raskazvała pra kampaniju ŭ papiarednim numary haziety, adznačyŭšy paśpiachovaść jaje minieralnaj vady «BanAkva». Nahadajem, što biełaruskaja «Koka-Koła» ŭvachodzić u chołdynh Coca-Cola Hellenic, kala čverci akcyj jakoha naležyć amierykanskamu ofisu, a jašče stolki ž — hrečaskamu inviestaru.
«Koka-Koła» letaś ščylna zaniałasia biełaruskim rynkam sokaŭ, kali za $5 miljonaŭ nabyła smalavickuju kampaniju «Vłanpak» (brendy Magic Summer, Rio i Joy). Adnak i raniej u našaj krainie aktyŭna pradavalisia soki, jakija vypuskajucca rasijskimi kampanijami, skuplenymi «Koka-Kołaj» — «Dobry», «Maja siamja» dy inšyja.
«Firma ABC» (ABC, Florida)
53-hadovy ŭradženiec Pskoŭskaj vobłaści Ivan Maisiejeŭ — adzin z samych bahatych žycharoŭ Hrodna i ŭłaśnik «Firmy AVS». Jahonaja kampanija isnuje z 1995, vyrablaje majanezy, kietčupy i raznastajnuju kansiervavanuju pradukcyju, u tym liku i soki.
Z dapamohaj «Firmy ABC» pryjści ŭ Biełaruś sprabavała amierykanskaja karparacyja PepsiCo. Partniory naładzili ŭ Hrodnie licenzijnuju vytvorčaść soku «Pryviet», adnak praz hod supracoŭnictva było zhornuta, bo PepsiCo nakiravała ŭsie vysiłki na kuplu vialikaj rasijskaj kampanii «Vim-bil-dan». Maisiejeŭ, u svaju čarhu, praciahnuŭ vypuskać sok ABC, a niadaŭna stvaryŭ jašče adzin brend — Florida.
Handlovy dom «Nioman» u centry Hrodna — jašče adzin aktyŭ rasijskaha biznesoŭca.
«Savuškaŭ pradukt» («Na100iaŝij», «Moncik»).
Kala 5% na rynku sokaŭ maje i brescki miljanier Alaksandr Mašenski. Soki — dadatkovy profil dziejnaści biznesoŭca, ułaśnika rybnaha «Santa-Bremara», małočnaha «Savuškavaha praduktu», sietki kramaŭ «Santa» dy inšych pradpryjemstvaŭ.
Ličba «100» u naźvie jahonaha brenda «Na100iaŝij» nie pavinna ŭvodzić u zman. Daloka nie kožny z napojaŭ maje 100% dolu pładovaj častki.
«Dziaržaŭnyja» soki
Narešcie, niekatoryja pradpryjemstvy zastajucca pad kantrolem Biełdziaržcharčprama ci abłasnych arhanizacyj. Naprykład, na kansiervavym zavodzie ŭ Klecku vypuskajucca časam vydatnyja soki «Niepasieda», «Naš», «Leto», u Barysavie — «Asałoda». U hety pieralik možna dadać i «Junik», jaki vypuskajecca minskim «Harmałzavodam №2». Hetyja brendy zajmajuć da 1-2% rynku, ale ŭsio adno mohuć być cikavyja dla inviestara.
***
Piepsi ŭ Biełarusi
Amierykanskaja karparacyja PepsiCo, jakaja vałodaje zavodami ŭ Rasii i va Ukrainie, pradaje na terytoryi Biełarusi pradukcyju sokavych brendaŭ «Ja», «Tonus», «Fruktovy sad», «Lubimy», «Sandora», «Sadočak». Dośvied pracy z hrodzienskaj «Firmaj AVS» akazaŭsia niaŭdałym.
Sok ci niektar?
U niektarach minimalnaja masa pładovaj častki składaje ad 25% (bananavy, manha) da 50% (jabłyčny, apielsinavy, piersikavy, ananasavy i inšyja). U sokach z cukram — jak minimum 85%. U naturalnych sokach pładovaja častka składaje 100%.
