Pierad aktyvistami niezaležnaha prafsajuzu na «Hranicie», jakija pracujuć kiroŭcami samazvałaŭ, načalstva stavić vybar — abo zastacca ŭ hetym prafsajuzie, abo atrymać novy «BiełAZ».
Pra heta «Svabodzie» paviedamiŭ pracaŭnik, jaki nazvaŭsia Vasilom. Spadar, jaki ŭžo nie adzin dziasiatak hadoŭ kiruje «BiełAZam», kaža, što načalnik aŭtatranspartnaha parku Alaksandar Kiśluk vyklikaŭ jaho na razmovu, dzie ahučyŭ takuju prapanovu:
«Majmu ekipažu, ź jakim pracuju, dajuć novy „BiełAZ“, a mianie pakidajuć na starym. Maŭlaŭ, kali nie vychodziš ź niezaležnaha prafsajuzu, to zastanieśsia na starym „BiełAZie“ i atrymaješ najhoršych naparnikaŭ. Albo, kali zabiaru zajavu, to ŭsio budzie narmalna, budu ŭ „narmalnych šerahach“, jak mnie skazali».
Rabočy kaža, što spačatku navat pahražali ŭvohule nia dać novy samazvał usiamu jahonamu ekipažu, jaki składajecca z 4 čałaviek. Takim čynam, kaža Vasil, jaho mierkavali pasvaryć z kalehami, ź jakimi adpracavaŭ šmat hadoŭ:
«Zrazumiejcie, što ad taho, na jakoj technicy ty pracuješ, zaležyć i tvoj zarobak. U novaha „BiełAZu“ i tanaž bolšy, i apłočvajecca praca na im lepš. Dyj bolš kamfortnyja ŭmovy pracy. Spačatku my dumali, što heta, moža, žart jaki, bo jak ža možna tak rabić tolki z-za prynaležnaści da prafsajuzu? Adnak potym načalnik i bryhadziru skazaŭ, kab my na novuju techniku navat i nie spadziavalisia».
Jak raspavioŭ kiraŭnik supołki niezaležnaha prafsajuzu na «Hranicie» Aleh Stachajevič, šantažujučy mašynami, administracyja damahłasia viartańnia niekalkich kiroŭcaŭ u aficyjny prafsajuz FPB. Spadar Stachajevič kaža, što časta načalstva imkniecca sutyknuć intaresy aktyvista niezaležnaha prafsajuzu i inšych kiroŭcaŭ ź jahonaha ekipažu: «Rabić takoje z pracaŭnikami, jakija zarekamendavali siabie ź lepšaha boku, jakija šmat hadoŭ pracujuć i na jakich nikoli nie było nijakich narakańniaŭ, — heta prosta ahidna i podła. U ludziej jość siemji, dzieci, jakija buduć budučyniaj Mikaševičaŭ. A načalstva prosta hetych ludziej šantažuje. Heta dyskryminacyja pavodle prynaležnaści da prafsajuzu. Robiać usio, navat samaje nizkaje, aby vykanać spuščanuju źvierchu zadaču — likvidavać niezaležny prafsajuz na «Hranicie».
