15 lipienia pačynajecca vyłučeńnie kandydataŭ u deputaty pałaty pradstaŭnikoŭ nacyjanalnaha schodu Biełarusi piataha sklikańnia.
Hetym pravam mohuć skarystacca palityčnyja partyi, pracoŭnyja kalektyvy i hramadzianie šlacham zboru podpisaŭ pa 13 žniŭnia ŭklučna.
Da 19 lipienia ŭklučna asoba, jakaja miarkuje vyłučacca kandydatam u deputaty, moža zarehistravać svaju inicyjatyŭnuju hrupu.
Źbirać podpisy možna ŭ formie pikietavańnia, na praviadzieńnie jakich nie patrabujecca dazvoł uładaŭ.U toj ža čas vykankamy ŭžo vyznačyli miesca, dzie pravodzić pikiety pa zbory podpisaŭ nielha. U Minsku pad takimi miescami vyznačany abjekty mietrapalitena (za vyklučeńniem terytoryj padziemnych piešachodnych pierachodaŭ), čyhunačnaha i pavietranaha transpartu; terytoryi šerahu płoščaŭ stalicy - Kastryčnickaj, Niezaležnaści, Pieramohi, Pryvakzalnaj, a taksama inšyja miescy, jakija znachodziacca pablizu orhanaŭ dziaržkiravańnia, dypłamatyčnych pradstaŭnictvaŭ i konsulskich ustanoŭ , sudoŭ, orhanaŭ prakuratury, terytoryj arhanizacyj, jakija zabiaśpiečvajuć abaronazdolnaść, biaśpieku dziaržavy i žyćciadziejnaść nasielnictva.
Sakratar Centravybarkama Mikałaj Łazavik ličyć nie duža efiektyŭnym sposabam zbor podpisaŭ na vulicach, bo, pavodle jaho słoŭ, mała chto nosić z saboj pašpart. Pra heta jon zajaviŭ na pres-kanfierencyi 11 lipienia. U toj ža čas Łazavik paraiŭ pradstaŭnikam palityčnych partyj vyłučacca mienavita šlacham zboru podpisaŭ, pakolki, adznačyŭ jon, ludzi zanadta mała viedajuć pra partyjnyja struktury.
Niekalki apazicyjnych partyj ŭžo pryniali rašeńnie ab praviadzieńni źjezdaŭ, na jakich buduć vyłučanyja kandydaty ŭ deputaty. Naprykład, Abjadnanaja hramadzianskaja partyja praviadzie źjezd 28 lipienia, Partyja BNF -- 4 žniŭnia.
Rehistracyja kandydataŭ u deputaty budzie doŭžycca ad 14 da 23 žniŭnia, a sami vybary ŭ pałatu pradstaŭnikoŭ projduć 23 vieraśnia.
