Aktyvisty inicyjatyvy «Pravaabaroncy suprać katavańniaŭ» nakiravali ŭ pracoŭnuju hrupu AAN pa advolnych zatrymańniach terminovy zvarot. Jany prosiać adreahavać na biespadstaŭnyja administratyŭnyja aryšty ŭ Biełarusi.
Zvarot infarmuje pra zatrymańnie Dźmitryja Kramianieckaha, Ramana Vasiljeva, Uładzimiera Jaromienka, Ivana Amielčanki. Hetym hramadzianam, jakija ŭžo adbyli administratyŭny aryšt, biez vyzvaleńnia pradjavili novyja abvinavačańni i aryštavali nanava. Aktyvist inicyjatyŭnaj hrupy, pravaabaronca Siarhiej Uścinaŭ patłumačyŭ Radyjo Svaboda, što ŭ takim vypadku ŭ abvinavačanych faktyčna niama mahčymaści ŭčynić pravaparušeńnie, u jakim jany abvinavačvajucca.
U zvarocie taksama adznačana, što «ŭmovy ŭtrymańnia ŭ CIP biesčałaviečnyja i prynižajuć čałaviečuju hodnaść: u kamerach niama asobnych spalnych miescaŭ, bializna nie vydajecca, niama štodzionnych prahułak na śviežym pavietry, temperaturnyja ŭmovy ŭnačy 13–14 hradusaŭ pavodle Celsija». Pravaabaroncy źviartajuć uvahu, što ŭsio heta nie adpaviadaje navat minimalnym standartnym praviłam abychodžańnia z zatrymanymi, jakija vyznačanyja AAN. Takija ŭmovy mohuć nanieści istotnuju škodu zdaroŭju aktyvistaŭ.
Na padstavie zvarotu pracoŭnaja hrupa moža, kali paličyć patrebnym, nakiravać zaklik da Ministerstva zamiežnych spraŭ Biełarusi, kab toje pryniało nieabchodnyja miery dziela zabieśpiačeńnia pravoŭ čałavieka. Siarhiej Uścinaŭ padkreślivaje, što biełaruskija ŭłady tak ci inakš musiać zreahavać na zvarot struktury AAN.
Pravaabaronca Taćciana Raviaka kamentuje, čamu supracoŭnictva sa strukturami kštałtu AAN važnaje dla abarony pravoŭ čałavieka ŭ Biełarusi: «Biełaruskija pravaabaroncy rehularna infarmujuć orhany AAN pra toje, što adbyvajecca ŭ krainie. Pierš za ŭsio tamu, što ŭ Biełarusi nie pracujuć pravavyja srodki, i my apracoŭvajem hetuju infarmacyju ŭ dastupnych nam mižnarodnych strukturach. Hetaja infarmacyja nia tolki źbirajecca, a analizujecca. Jość advarotnaja suviaź u vyhladzie zvarotaŭ da biełaruskich uładaŭ. Heta robicca nie adkryta. Sami orhany AAN źviartajucca da biełaruskaha MZS, što jany atrymali takuju i takuju infarmacyju, sprabujuć vieści dyjaloh i vyśviatlajuć akaličnaści asobnych spraŭ. Heta pakazvaje našaj dziaržavie, što mižnarodnaja supolnaść u kursie taho, što adbyvajecca z pravami čałavieka ŭ Biełarusi.
Da taho ž u červieni planujecca sesija Rady pa pravach čałavieka, dzie, mahčyma, budzie pradstaŭlenaja rezalucyja pa sytuacyi z pravami čałavieka ŭ Biełarusi. Viadoma, važna, kab struktury AAN, farmulujučy svajo bačańnie sytuacyi, vałodali infarmacyjaj, atrymanaj z pravieranych krynic i prafesijna aformlenaj.
Ja b nie skazała, što namahańni pravaabaroncaŭ biezvynikovyja. Kali b my hetaha nie rabili, to mižnarodnaj supolnaści i pravaabarončym strukturam AAN zdavałasia b, što ŭ nas cicha dy hładka, a z pravami čałavieka poŭnaja harmonija. Pakolki ž idzie ŭvieś čas infarmavańnie i struktury AAN źviartajucca da Biełarusi, heta robić svoj upłyŭ. Viadoma, heta nie taki ŭpłyŭ, jak my b chacieli. Heta nie spyniaje naŭprost i hetych advolnych zatrymańniaŭ, i inšych prajavaŭ parušeńnia pravoŭ čałavieka. Ale kali hetaha nie rabić, to navat nia viedaju, jakija b pamiery heta mieła».
