Hałoŭny trenier minskaha «Junactva» i były hałoŭny trenier zbornaj Biełarusi Michaił Zacharaŭ źjaŭlajecca adnym z kandydataŭ na pasadu asistenta Kary Chiejkila ŭ minskim chakiejnym «Dynama». Ab hetym 1 červienia na sustrečy sa ŚMI paviedamiŭ spartyŭny dyrektar kłuba Ihar Matuškin.
«U trenierskim štabie ŭ nas zastałasia vakansija jašče adnaho asistenta. Koła kandydataŭ — piać biełarusaŭ i adzin rasijanin. Siarod ich jość i Alaksandr Andryjeŭski, jaki adpracavaŭ dva z pałovaj hady ŭ sistemie kłuba, byŭ pamočnikam Chiejkila na čempijanacie śvietu. Michaił Zacharaŭ? Tak, jon taksama ŭvachodzić u lik pretendentaŭ na hetuju pasadu. Chacia ja nie viedaju, u suviazi z tym, što jany chočuć hulać u KCHŁ, heta budzie składana zrabić», — adznačyŭ Matuškin.
Pavodle jaho słoŭ, pa prośbie hałoŭnaha treniera Kary Chiejkila «Dynama» zaklučyła pahadnieńnie z novym trenieram pa varatarach — finskim śpiecyjalistam Ary Chili. «Jon vychavaŭ šerah dobrych varataroŭ, jakija hulać u NCHŁ. My spadziajemsia, što Ary padciahnie Łałanda i Chaŭhiena, a taksama maładych biełaruskich hałkipieraŭ Šelapniova i Karnauchava», — zaŭvažyŭ Matuškin.
Spartyŭny dyrektar taksama abjaviŭ ab praciahu kantrakta z trenieram Jaŭhienam Papichinym. «Jaho praca ŭ minułym siezonie nie vyklikała nijakich pytańniaŭ», — padkreśliŭ Matuškin.
Jak zapeŭniŭ žurnalistaŭ spartyŭny dyrektar «Dynama», u kłuba nie ŭźnikła nijakich sumnieńniaŭ u trenierskim talencie Kary Chiejkila paśla niaŭdałaha vystupleńnia zbornaj Biełarusi na čempijanacie śvietu.«Sumnieńniaŭ u dačynieńni da Chiejkila ŭ nas niama, — zajaviŭ Matuškin. — Kary pieršy raz pracuje ŭ sistemie zbornych i ŭ hetym jość svaja śpiecyfika. Adna sprava — praca ŭ kłubie, inšaja — u nacyjanalnaj kamandzie». Pavodle słoŭ Matuškina, u kantrakcie z Chiejkila niama punkta ab mahčymaści daterminovaha spynieńnia supracoŭnictva pa inicyjatyvie kłuba.
Z 9 lipienia «Dynama» płanuje dać mahčymaść pačać treniroŭki ŭsim chakieistam, jakija znachodziacca ŭ sistemie kłuba. Aficyjna padrychtoŭku da novaha siezona kłub pačnie 23 lipienia.