Z «Buranaŭskimi babulami» pasupierničajuć małdavanin i rumyny + ŭsie ŭdzielniki j pieśni, videa 27

Siońnia ŭ Baku — pieršy paŭfinał «Jeŭrabačańnia-2012».

Hałoŭnaja radaść viečara, dy i ŭsiaho konkursu — udzieł udmurckaha fołk-hurtu «Buranaŭskija babuli» (pa-ŭdmurcku — «Branhurtyś piesianajos»),

jaki reprezientujuć na «Jeŭrabačańni» Rasiju.

Hurty takoha kštałtu ŭ Biełarusi raniej masava vystupali ŭ pieradačy «Zaprašajem na viačorki». Jon uźnik pry zvyčajnym Domie kultury. Babuli — sapraŭdnyja babuli — śpiavajuć pieśni na rodnaj movie, a taksama zajmieli papularnaść u internecie pierapieŭkami suśvietnych chitoŭ.

Najmaładziejšaj udzielnicy hurtu 43 hady, najstarejšaj — 85. Jany praśpiavali ŭ Baku svaju humarnuju pieśniu Party for Everybody. Padčas vystupu na scenie źjaviłasia piečka. Amal sapraŭdnaja, z dymam.

Pazityŭnyja i kałarytnyja śpiavački kantrastavali z bolšaściu «farmatnych» udzielnikaŭ konkursu.

Ziemlaki «Buranaŭskich babul» sabralisia ŭ viaskovym kłubie, kab razam hladzieć svaich ziamlačak.

Biełaruś na «Jeŭrabačańni» pradstaŭlaje hurt Litesound. Jon vystupić u druhim paŭfinale — 24 maja.

Kali ŭsio ž taki Litesound budzie ŭ finale, to z kim daviadziecca spaborničać? Vyniki pieršaha paŭfinała takija:

Rumynija — što i patrabavałasia dakazać: łacinaamierykanskija rytmy niepieramožnyja.

Małdova — bałkanskuju muzyku moža paraŭnać z łacinaamierykanskaj pa patencyjale.

Isłandyja — a voś heta niečakana, nie samaja chitovaja pieśnia, ale ŭzrovień vysoki.

Vienhryja — a kažuć, što kampakt-dyski svajo adžyli.

Danija — voś i Hvatemała padciahnułasia, što, kaniečnie, dobra.

Ałbanija — jašče raz pasłuchajem emacyjnyja śpievy, jakija na hetym konkursie sustrakajucca redka.

Kipr — sprava Biejonse žyvie paralelna z samoj Biejonse.

Hrecyja — aranžyroŭka aranžyroŭkaj, a dziaŭčyna tam pryhožaja.

Rasija — nu, u babulkach nichto nie sumniavaŭsia.

Irłandyja — kali nie pieramohuć, ubačym bliźniataŭ i ŭ nastupnym hodzie.

* * *

Zaprašajem anłajn adsačyć, jak zmahalisia za vychad u finał našyja patencyjnyja supierniki. U siońniašniaj prahramie zajaŭlenyja: babuli z Udmurcii, fryki z Čarnahoryi, zmročnyja isłandcy i inšyja piersanažy: cikavyja i nie vielmi. Jak i letaś, nahadajem: mierkavańnie aŭtara subjektyŭnaje, i ad jaho, na žal, ničoha nie zaležyć.

Čarnahoryja

Rambo Amadeus

Euro Neuro

Raspačałosia Jeŭrabačańnie z frykaŭ — niechta Remba Amadeus śpiavaje pieśniu, pra nacyjanalizm-patryjatyzm-militaryzm-altruizm-libieralizm

dy inšyja, nie mieniej cikavyja rečy. Džazist Amadeus śpiecyjalna čytaje rep na takoj anhlijskaj movie, jakoj by pazajzdrościŭ rasijski ministr Mutko, ź jahonym «śpik inhliš from maj chart». Ale ŭsio heta zroblena z humaram, časam nie samym palitkarektnym — na YouTube pad hetym klipam užo idzie sapraŭdnaja bojka.

Žyŭ by Amadeus u nas — byŭ by ŭ «čornym śpisie».

Isłandyja

Hreta Sałoŭme i Jonsi

Never Forget A voś hetaja paračka na Jeŭrabačańni ŭžo nie pieršy raz. Zaŭvažcie, jakuju atmaśfieru jany adrazu stvaryli — voś što značyć surovyja paŭnočnyja narody: pieramahčy takich budzie niaprosta. Cikava, kolki bałaŭ im daduć našyja suajčyńniki.

Zatoje jakaja simpatyčnaja miełodyja — z takoj pieśniaj varta jechać u druhi raz.

Hrecyja

Elefteryja Elefteryŭ

Aphrodisiac

O!

Urešcie Jeŭrabačańnie možna paznać — voś vam i typovaja pieśnia pra kachańnie, viasioleńkaja i z prypievam pra «dens-dens».

Papsa papsoj — niby aranžyroŭku rabili niedzie ŭ Biełarusi ci ŭ Rasii. A što, u Hrecyi kryzis jak-nijak. Elefteryju Elefteryŭ nazyvajuć adnoj z favarytaŭ paŭfinała. A što — dziaŭčyna vielmi pryhožaja.

Łatvija Anmary

Beautiful Song

«Ja naradziłasia ŭ dalokim 1980-m hodzie…" paviedamlaje nam u pieršym ža radku łatvijskaja śpiavačka rasiejskaha pachodžańnia Anmary (Linda Amantava). Jaje «Charošaja pieśnia» — amierykanskaja tradycyjnaja bałada, nie pa hučańni, ale pa źmieście: ja naradziłasia tady i tam, maci skazała — budzieš śpiavać, tata padaryŭ pieršuju hitaru i h.d. Ale z chepi-endam: ciapier na radyjo pryhožaja pieśnia, jakuju ŭsie śpiavajuć.

Kali ŭ finał Anmary nie trapić, moža troški padpravić tekst i vykarystoŭvać pieśniu jak reziume.

Ałbanija

Rona Nišliŭ

Suus

Kažuć, Rona Nišliŭ — — pieršaja kosaŭskaja ałbanka, jakaja pradstaŭlaje Ałbaniju na Jeŭrabačańni.

Śpiavaje pieśniu adrazu na dźviuch movach — na ałbanskaj i na łacinie. I, viedajecie, heta hučyć vielmi navat ničoha — kaniečnie, kali vy lubicie, fartepijannyja bałady i śpiavačak, jakija mohuć doŭha trymać notu.

Śpiavaje Rona z sapraŭdnym nadryvam, i navat moža spaborničać z arkiestram, jaki prosta pierakryvaje hołasam.

Takija emocyi nie dadajuć razborlivaści tekstu pieśni.

Rumynija Mandinga

Zaleilah

Pop-hurt z Rumynii taksama traplaje ŭ śpis favarytaŭ. A ŭsio čamu? Bo aproč skrupuloznaha adsočvańnia sioletniaha muzyčnaha kanonu, jaki tak lubiać udzielniki Jeŭrabačańnia,

jany dadali ŭ pieśniu łacinaamierykanskija rytmy i instrumienty —

ad hetaha zaŭždy možna vyjhrać, asabliva kali ŭ astatnim kanon nie parušać, i kali ŭ vašym hurcie pryhožaja vakalistka. U finale ŭbačym jašče raz.

Šviejcaryja Sinplus

Unbreakable

Šviejcarcy Sinplus napisali idealnuju dla radyjofarmata pieśniu — usiaho dźvie chviliny siamnaccać siekund. Nasamreč, navat našyja radyjostancyi ŭžo kruciać niešta padobnaje —

mienavita tak i vyhladaje pop-rok: zapaminalny refren, vakalist ź irakiezam i zvyšvyraznaj mimikaj (navat praźmierna), hitaryst, jaki skača pa scenie i bubnač u profil padobny na małodšaha navukovaha supracoŭnika.

Šancy ŭ chłopcaŭ jość. Chacia, kali b pieśnia doŭžyłasia try chviliny, šancaŭ stała b mieniej.

Bielhija Iris

Would You

Popyt na fartepijannyja bałady niaŭchilna raście — voś jašče adna, takuju stavić na telebačańni budzie praściej, čym ałbanskuju. Dy i adčuvajecca praca prafiesijnych chitmejkieraŭ — takich pieśniaŭ u efiry šmat.

Mieładyčna, simpatyčna, pra kachańnie i padbadziorvaje — kali b tak śpiavała Alena Łanskaja, to možna było abychodzicca biez dapamohi viciebskich ideołahaŭ.

Finlandyja

Pierniła Karłsan

När Jag Blundar

Uvohule,

Pierniła Karłsan — handbalistka, jakaja praśpiavaje nam pieśniu «Kali ja zapluščvaju vočy».

Zdahadajciesia, jaki instrumient ihraje rytm? Tak, heta jano — fartepijana. Pačałosia Jeŭrabačańnie vystupam simpatyčnaha fryka, a praciahvajecca baładami, ź jakich ciažka niešta abrać. A bałady pa-šviedsku (Pierniła naležyć da šviedskaj mienšaści) — heta, miž inšym, pryhoža. A ŭ siaredzinie i arkiestr dałučyŭsia — taksama simpatyčna, i miełodyja typovaja, ale cikavaja. Nie, nie było b u Łanskoj šancaŭ — jaje kankurentki vyhladajuć lepiej.

Izrail Izabo

Time

Izrailski indzi-rok-hurt pačynaje z barabannaha bita, prymušajučy ŭzhadać chity 1950-ch. Žanočyja bek-vakały, prazrystaja hitara, i soła na strunnych —

takoje sabie retra,

dy ŭ klipie estetyka taho času vielmi prasočvajecca. Čamu b i nie pasłuchać ich jašče raz — u finale.

San-Maryna

Valancina Maneta

The Social Network Song

Pieśnia pra toje, što ŭsie my lubim bolej za fartepijannyja bałady ŭ lubym vykanańni — sacyjalnyja sietki.

Spačatku pieśnia nazyvałasia Facebook Oh, Oh, Uh, ale arhanizatary Jeŭrabačańnia paprasili padredahavać.

Voś na Valancinu možna było b jakuju manietu i pastavić — typovy pop-šlahier našaha času, chitovy patencyjał vidavočny. I šancaŭ biez «Fejsbuku» ŭ naźvie stała bolej — u krainach, dzie bolej za ŭsio lubiać Jeŭrabačańnie, papularnyja troški inšyja sacyjalnyja sietki.

Kipr

Ivi Adamu

La Love

A voś jašče adna pieśnia, zroblenaja pa pryncypie sučasnaha chita.

Kipr pradstaŭlaje Ivi Adamu, jakaja zachaplajecca tvorčaściu Biejonse

dy inšych topavych artystaŭ.

Takoj muzyki ŭ śviecie mnoha,

ale Ivi zastajecca adnoj z favarytak konkursa. Pa zrazumiełych pryčynach, jakija nie varta ahučvać, užo paśla pieršych 30 siekund treka — radyjofarmat jak jon jość. Pryčym za abrazu hetyja słovy ličyć nie treba.

Danija

Sałuna Samaj

Should've Known Better

Sama

Sałuna rodam zusim nie z Danii, a z Hvatemały.

Soŭłavyja notki ŭ Sałuny, a taksama nienaviaźlivaja akustyčnaja hitara, jakaja zapaŭniaje paŭzu pamiž tłustymi prypieŭnymi aranžyroŭkami, całkam mohuć spracavać.

Rasija

Buranaŭskija babuli

Party for Everybody

Udmurckija babuli ŭžo nabrali stolki ž prahladaŭ na YouTube, kolki ich papiarednija kankurenty ŭziatyja razam. Toje, što

jany śpiavajuć na anhlijskaj i ŭdmurckaj adnačasova,

robić ich jašče bolš niezvyčajnymi i charyzmatyčnymi. Kaniečnie, aproč prestyžu Rasii hetaja pieramoha naŭrad ci što daść, ale ž ad Brytanii vystupić Enhielbiert Champieprdzink, čyj uzrost nabližajecca da ŭzrostu babulek, čamu b i nie.

. Vienhryja

Compact Disco

Sound of the Hearts

A voś vienhierski hurt Compact Disco, ź pieśniaj z aryhinalnaj nazvaj «Huk sercaŭ». Hučańnie ŭ pieśni adpaviednaje, paśla babulek hladzicca sumnavata, adnak

lohkaja elektronika z kanca 80-ch aktualnaści nie hublaje.

Bolej i skazać niama čaho.

Aŭstryja Trackshittaz

Woki Mit Deim Popo

Chip-chop duet ź pieśniaj «Ruchaj popaj» i dziaŭčynami, jakija tančać vakoł šasta. A paśla pačynajuć śviacicca ŭ ciemry. U astatnim — jašče adzin dobry prykład pieśni, zroblenaj pa kanonach sučasnaha chitmejkierstva. Cikava, a ŭsie aŭstryjskija i niamieckija vykanaŭcy, jakija majuć dačynieńnie da elektronnaj muzyki, nosiać kaściumy? U lubym vypadku, na jakim-niebudź kanale my hetuju pieśniu jašče ŭbačym i pačujem.

Małdova

Paša Parfienij

Lăutar

Jaho prezientujuć jak śpievaka i kampazitara, jaki pieramoh na «Słavianskim bazary». Tak i čakaješ ubačyć i pačuć niešta kštałtu «Vierasoŭ». Zamiest hetaha majem bałkanski kalektyŭ sa skrypkami, dudkami, «chonki-tonk» kłavišami i miełodykaj, jakaja ŭsio imkniecca pierajści ŭ step. Prynamsi,

tančyć pad takoje možna — jość mierkavańnie, što ŭ finale jašče ŭbačym spadara Parfienija i jahony bend.

Irłandyja Jedward

Waterline

I zakryvajuć naš siońniašni paŭfinał braty-bliźniaty ź Irłandyi, jaki šturmujuć Jeŭrabačańnie ŭžo druhi raz zapar — letaś jany spynilisia na vośmym miescy, ale vyrašyli, što sioleta šansaŭ bolej. I

pajšli samym prostym šlacham — iznoŭ stvaryli pieśniu dla luboj radyjostancyi śvietu, pastavili dybaram vałasy,

jak hipierbalizavanyja hłem-rokiery70-ch. Miarkujučy pa tym, što siońnia prahučała, asablivych šancaŭ bolej čym na vośmaje miesca ŭ ich niama. Adnak možna pasprabavać u nastupnym hodzie, a raptam?