Parkavaja mahistral, praśpiekt Mašerava, praśpiekt Pieramožcaŭ — adna z hałoŭnych daroh Minska. Vakoł jaje budujecca elitnaje žyllo, niepadaloku znachodziacca i katedžy vyšejšych čynoŭnikaŭ. Pa praśpiekcie Pieramožcaŭ štodnia jedzić prezidencki kartež, tamu darohu dahladajuć dziasiatki rabočych. Navat trava, jakaja raście na raździalalnaj pałasie, zavozicca z-za miažy.
1. Akvapark
2. Mikrarajon "Ržaviec"
3."Altersalušns"
4. Nacyjanalny Alimpijski kamitet + hatel Radisson
5. Novaja rezidencyja
6. "Zamak"
7. Hatel "Viktoryja"
8. Muziej VAV
9. "Rojał-Płaza"
14. Hatel na Naračanskaj
15. Biznes-centr "Pakroŭski"
17. "Słavianski kvartał"
Što zmoža ŭbačyć hość stalicy, kali praź niekalki hadoŭ źviernie z MKAD na praśpiekt Pieramožcaŭ?
1. Akvapark
Tak i nie znajšoŭšy nivodnaha inviestara, haradskija ŭłady pačali budavać pieršy staličny akvapark samastojna, rukami «Minskbuda» i kredytnymi hrašyma «BPS-Aščadbanka». Ahulny košt prajekta składaje kala $80 miljonaŭ.
Akvapark budujecca stachanaŭskimi tempami. Pracy nie spyniajucca i ŭ vychodnyja, a časam na dapamohu pryjazdžaje i Alaksandr Łukašenka. Prynamsi, na krasavickim subotniku jon kłaŭ cehłu ŭ adnu sa ścienaŭ akvaparku. Budaŭnikam zastaŭsia roŭna hod da zdačy abjekta, a pieršych naviedvalnikaŭ tut čakajuć 3 lipienia 2013 hoda.
2. Mikrarajon Ržaviec (Lebiadziny)
Terytoryja hetaha mikrarajona «pradavałasia» dvojčy. Spačatku prava na budaŭnictva atrymała rasijskija miljanierka Alena Baturyna. Kali jaje muža Juryja Łužkova adchilili ad pasady mera Maskvy, Minharvykankam znajšoŭ novaha partniora, na hety raz — kitajskuju «Bi-Ju-Si-SI». «Elitnaje žyllo» pieraŭtvaryłasia ŭ prajekt žyłych vysotak z kvartałam katedžaŭ. Praŭda, praz adsutnaść kamunikacyj nivodzin dom u Ržaŭcy dahetul nie moža być zdadzieny.
3. «Altersalušns»
Adno z padraździaleńniaŭ «Trajpła» amal dabudavała hihancki zabaŭlalny kompleks nasuprać «Minsk-Areny», zakryŭšy im ad praśpiekta elitnyja damy pa vulicy Pijanierskaj. Daŭžynia budynka składaje bolš za 400 mietraŭ, što robić jaho adnym z samych doŭhich u stalicy. Kompleks Juryja Čyža, jaki pakul jašče nie atrymaŭ hučnuju nazvu, uklučyć u siabie hipiermarkiet, kazino, kinateatr, aŭtasałon, fitnes-centr i restarany.
4. NAK + Radisson
Letaś rasijski inviestar spyniŭ finansavańnie budoŭli, i jana zamaroziłasia amal na hod. Adnak inicyjatyvu padchapiŭ Minharvykankam, jaki ciapier dabudoŭvaje svaimi siłami štab-kvateru Nacyjanalnaha alimpijskaha kamiteta i 4-zorkavy hatel Radisson ź vidam z numaroŭ na mohiłki. U lepšym vypadku abjekty buduć zdadzienyja ŭ 2014, adnak užo ciapier vidać, što jon moža stać adnym z samych pryhožych budynkaŭ biełaruskaj stalicy.
5. Novaja rezidencyja kiraŭnika dziaržavy
Na pierakapanaj parkavaj zonie kala Śvisłačy praciahvajecca ŭźviadzieńnie tajamničaha kompleksu z rezidencyjaj i budynkam dla hanarovych pryjomaŭ. Za hłuchoj aharodžaj ź sistemaj videanazirańnia štodnia kruciacca čatyry krany i pracujuć dziasiatki rabočych. Pakul im udałosia vyvieści budynak na ŭzrovień treciaha paviercha.
6. «Zamak»
Anałah zabaŭlalnaha kompleksu ad «Altersalušns» paŭstanie nasuprać novaj rezidencyi Łukašenki. Voś tolki zamiest Juryja Čyža ŭłaśnikam budzie Pavieł Tapuzidzis, a zamiest «Trajpła» adkryjecca hipiermarkiet «Karona». Krama techniki, restarany, kazino, stryptyz-kłub — typovy nabor dla bujnoha handlovaha centra ŭ Minsku siońnia.
Z navinak varta ŭzhadać pieršuju ŭ Minsku ladovuju placoŭku pasiarod kramy. Čym jašče «Zamak» budzie vyłučacca, dyk heta interjerami — kompleks vykanany ŭ vyhladzie siaredniaviečnaj handlovaj vulicy.
Pieršy puskavy kompleks (100 tysiač kv.m) koštam $120 miljonaŭ płanujecca adkryć užo sioleta na 3 Lipienia. Heta budzie najbujniejšy šopinh-moł Biełarusi.
7. «Viktoryja»
Budoŭla druhoha puskavoha kompleksu municypalnaha hatela «Viktoryja» idzie žvavieńka. Pabudavana ŭžo 10 pavierchaŭ, pałova ad zapłanavanaha. Ułaśnikam budzie kamunalnaje pradpryjemstva «Biznes-centr «Stalica», a pracy viaduć polskija rabočyja. Ahulny košt prajekta składaje kala 50 miljonaŭ jeŭra.
8. Muziej VAV
Dla ŭłady hety abjekt druhi pa pryjarytetnaści paśla akvaparku. Padčas subotnika tut zalivała bieton druhaja asoba krainy — premjer-ministr Michaił Miaśnikovič. Miarkujecca, što muziej pierajedzie z Kastryčnickaj płoščy na novuju placoŭku ŭ 2014. Hrošy na jaho budaŭnictva iduć ź biudžetu, a taksama z rachunka dobraachvotna-prymusovych achviaravańniaŭ bie-łarusaŭ. Ahułam ža treba ŭziać adniekul bolš za $50 miljonaŭ. Łahičny varyjant, kab budaŭnictva apłaciŭ inviestar, jaki budzie budavać niešta na miescy staroha muzieja, haradskimi čynoŭnikami ŭparta nie razhladajecca.
9. «Rojał Płaza»
Livanskaja kampanija «Rubiroz Internešnł» skančaje budaŭnictva stamietrovaj ofisnaj viežy — karkas budynka hatovy, zastałosia škleńnie. Livancy vałodajuć užo handlovymi centrami «Jeŭropa» i «Ryha», a taksama kafe «Bibłas».
Vyhladaje na toje, što mienavita «Rojał Płaza» stanie pieršym sapraŭdnym chmaračosam u Biełarusi. Jaje kankurenty faktyčna zamarozili svajo budaŭnictva.
10. Galleria Concept
20-paviarchovy handlovy centr z hatelem musić uźniknuć na miescy źniesienaha internata BDU. Narviežski inviestar hatovy ŭkłaści ŭ budaŭnictva $150 miljonaŭ. Žychary susiednich damoŭ vystupali suprać budaŭnictva, ale Minharvykankam adstajaŭ prajekt.
Što jašče?
11. Pryvatnaja škoła. U elitnaj navučalnaj ustanovie «Trajpła» zmohuć vučycca 400 dziaciej.
12. Azdaraŭlalny kompleks z ofisnymi pamiaškańniami budzie naležyć «Zavodu vinahradnych vinaŭ «Dyjonis».
13. Žyły kompleks «Słavianski». Try žyłyja damy i hatel buduje rasijskaja kampanija «Bielinterrosinviest»
14. Hatel na Naračanskaj. 35-paviarchovy budynak budzie kaštavać rasijskamu miljanieru Mikałaju Burnosu $120 miljonaŭ.
15. Biznes-centr «Pakroŭski». Zabudoŭščyk «Trest Prambud».
16. Rekanstrukcyja vystavačnaha centra «Biełekspa».
17. «Słavianski kvartał». Try žyłyja damy buduje kampanija «Źniešekanambud» na čale z byłym staršynioj Minharvykankama Uładzimiram Jarmošynym.
