Alaksandr Łukašenka zajaviŭ pra supadzieńnie pazicyj Biełarusi i Kazachstana ŭ pytańniach raźvićcia intehracyjnych pracesaŭ, u tym liku adnosna funkcyjanavańnia Adzinaj ekanamičnaj prastory.
«Što tyčycca AEP, u nas tut absalutna identyčnyja pohlady», — zajaviŭ Łukašenka 14 maja ŭ Minsku.
«Niedaloki toj čas, kali vykazanaja vami paŭtara dziasiatka hadoŭ tamu ideja ab stvareńni Jeŭrazijskaha sajuza nie tolki nabudzie abrysy, ale i napoŭnicca kankretnym źmiestam. U nas niama niavyrašanych palityčnych prablemaŭ, hetak ža my dziejničajem i ŭ ekanamičnym rečyščy», — adznačyŭ Łukašenka.
Łukašenka padziakavaŭ Nazarbajevu, što toj «ćviorda trymaje svajo słova, my sustrakajemsia ŭ Astanie i Minsku, kab kantralavać pryniatyja raniej rašeńni».
Łukašenka adznačyŭ, što padčas hetaha vizitu jon sustrakajecca z Nazarbajevym užo nie pieršy raz:
«My mieli mahčymaść abmierkavać vielmi šmat pytańniaŭ, i ja ŭdziačny vam za toje, što vy pryjechali pahladzieć Biełaviežskuju pušču — hety ŭnikalny abjekt».
U minułyja vychadnyja kiraŭniki Biełarusi i Kazachstana niefarmalna razmaŭlali ŭ Biełaviežskaj puščy.
Nursułtan Nazarbajeŭ zajaviŭ, što jon «zachopleny tym, što vychadnyja praviali razam»: «Ja ŭpieršyniu naviedaŭ vydatny kutok našaj płaniety. Biełaruś dla nas — stratehičny partnior, blizki siabra i sajuźnik. U nas vialikija čakańni ad Mytnaha sajuza, AEP, što jašče bolš zbližaje našy krainy. Bližejšych sajuźnikaŭ, čym Rasija, Biełaruś i Kazachstan, na postsavieckaj prastory niama».
Nazarbajeŭ vykazaŭ upeŭnienaść u tym, što ciapierašni vizit u Biełaruś «padymie našy adnosiny na novuju vyšyniu».
Kiraŭniki Biełarusi i Kazachstana paviedamili, što paśla pieramovaŭ u Miensku nakirujucca ŭ Maskvu, dzie 15 maja projdzie samit ADKB i niefarmalnaja sustreča lidaraŭ kiraŭnikoŭ dziaržaŭ SND.
