Najbujniejšy ŭ krainie handlova-zabaŭlalny kompleks «Zamak» zapracuje 3 lipienia 12
Tam adkryjuć kazino, stryptyz-kłub i ladovuju placoŭku.
Padychodzić da zaviaršeńnia budaŭnictva najbujniejšaha ŭ krainie šmatfunkcyjanalnaha handlova-zabaŭlalnaha centra, jaki raźmieščany na praśpiekcie Pieramožcaŭ u stalicy. U intervju «Minskamu kurjeru» kiraŭnik administracyi Centralnaha rajona Minska Uładzimir Kucharaŭ paviedamiŭ, što ŭvieści pieršy puskavy kompleks (kala 100 tysiač kv.m) płanujecca da Dnia niezaležnaści — 3 lipienia.
Jak skazana na sajcie «Karony» («Zamak» buduje «Tytuń-Inviest»), interjery kompleksu vykananyja ŭ vyhladzie siaredniaviečnaj handlovaj vulicy ź miescami dla adpačynku naviednikaŭ, abstalavanaj dekaratyŭnymi zialonymi nasadžeńniami, śviacilniami, fantanami i vadzianymi kaskadami roznaj vieličyni.
Na pieršym paviersie HZK raźmieścicca hipiermarkiet płoščaj bolš za 6 tys. kv.m, a taksama «Karona — Techna» płoščaj bolš za 3 tys. kv. m. Na druhim i trecim pavierchach źjaviacca kramy viadomych brendaŭ: Calvin Klein, Benetton, Marc O'Polo, DIM, Motivi, Olsen i inš. Tut ža adkryjuć kramy suvieniraŭ, parfumieryi i kaśmietyki, tavaraŭ dla dziaciej, nejł-bar, kaviarni, adździaleńni bankaŭ, sałon pryhažości.
Na čaćviortym paviersie budzie zabaŭlalny kompleks: z načnym kłubam, šmatlikimi restaranami, załaj hulniavych aŭtamataŭ i navat ladovaj placoŭkaj.
Taksama zabudoŭščyk šukaje arandataraŭ dla adkryćcia kazino (zała na 551 kv.m), stryptyz-kłuba (320 kv.m) i multypleksu na 3 zały pa 250 miescaŭ. Na dumku śpiecyjalistaŭ, metavaja aŭdytoryja novaha HZK — usie žychary Minska, što pracujuć, a taksama hości horada.
Jašče adzin bujny handlova-zabaŭlalny centr («Karona-Uručča») u dadzieny momant aktyŭna budujuć u rajonie pierasiačeńnia pr. Niezaležnaści i MKAD, niedaloka ad «karablika» — navučalnaha korpusa BNTU.
