Režysior Siarhiej Łaźnica raspavioŭ «Biełsatu» detali pra ekranizacyju apovieści Vasila Bykava, jakuju prezientuje ŭ Kannach.
Na jeŭrapiejskim fiestyvali numar adzin biełaruskaja stužka «U tumanie» pazmahajecca z hanhstarskaju dramaju «Kradziež u kazino» z Bredam Pitam u hałoŭnaj roli, a taksama filmam Uesa Endersana «Karaleŭstva poŭni».
Praca Siarhieja Łaźnicy budzie pakazana ŭ asnoŭnym konkursie Kanskaha kinafiestyvalu. «Dziejańnie adbyvajecca na terytoryi akupavanaj niemcami Biełarusi ŭ 1942 hodzie. Mianie cikavić hety čas, hetaje miesca, hetyja ludzi. Takich, jak hieroj apovieści Bykava (na moj pohlad, niezasłužana zabytaj i niedačytanaj), amal nie zachavałasia», — tłumačyć režysior.
Hałoŭny hieroj apovieści dy filmu — puciavy abchodčyk Suščenia, jahonuju rolu vykanaŭ biełarus Uładzimir Śvirski. Partyzany jeduć zabivać abchodčyka za supracu ź niemcami. I davieści, što toj nie kałabarant, — niemahčyma.
Režysior naradziŭsia ŭ Baranavičach, kudy šmat razoŭ pryjazdžaŭ naviedać babulu. Potym žyŭ va Ukrainie, Rasiei, ciapier – u Niamieččynie. Jon nie źviazvaje siabie ź niejkaju kankretnaju krainaju. Samaje hałoŭnaje — dobryja ŭmovy dla pracy. Stvarać u Miensku i Kijevie jamu pieraškadžaje ciažkoje pavietra. «Niejki brud, zaviś jość, prosta fizična», — tłumačyć jon.
Maniera sučasnaha kino vyznačajecca dakumientalnaściu. Manumientalnaje apaviadańnie patrabuje takich ža zdymkaŭ. «Kamiera hruntoŭnaja, – dadaje surazmoŭca. — Na zdymkach vykarystoŭvalisia kran, štatyŭ, rejki, ale jość u tym liku i ručnaja kamiera».
Hałoŭnaha hieroja Łaźnica nie aceńvaje: «Situacyja pazbaŭlaje jaho vybaru. Jahonaje rašeńnie — nie vyjście ź situacyi, a mažlivaść vyratavać siabie. Što stvaraje takuju situacyju — voś što mianie cikavić». U jaje moža trapić kožny, padkreślivaje režysior, i pryznajecca: kaliści takoje daviałosia pieražyć i samomu. I tut ža dadaje: «Heta nie abaviazkova zakančvajecca takim vyjściem, jakoje jość u apovieści».