U dvuchdzionnaj kanferencyi, tema jakoj — pryvatyzacyja, voźmuć udzieł bolš za try dziasiatki admysłoŭcaŭ ź Biełarusi dy krainaŭ Eŭraźviazu. Siarod arhanizacyjaŭ — MZS Polščy, Fundacyja mižnarodnaj salidarnaści dy Birža kaštoŭnych papieraŭ.
Admietna, što arhanizatary zaprasili taksama niekalkich pradstaŭnikoŭ aficyjnaha Miensku, adnak, pavodle našaj infarmacyi z krynicaŭ u MZS Polščy, papiarednie pryjechać u Varšavu daŭ zhodu tolki adzin ź ich.
U kanferencyi voźmuć udzieł eŭrakamisar Štefan Fiule, ministar zamiežnych spravaŭ Polščy Radasłaŭ Sikorski i, siarod inšych, suśvietna viadomy ekanamist, prafesar Lešek Balcerovič, jaki vystupić z dakładam.
Admietna, što proźviščy biełaruskich udzielnikaŭ nie padajucca z taje pryčyny, što ich mohuć zatrymać na miažy. Viadoma, što heta pradstaŭniki ŭsich hałoŭnych apazycyjnych partyjaŭ dy niezaležnyja eksperty.
Havoračy pra mety kanferencyi dy ŭsiaje prahramy, dyrektar Uschodniaha departamentu MZS Polščy Artur Michalski adznačyŭ:
«My chočam zaprapanavać vielmi pazytyŭnuju palityku ŭ dačynieńni Biełarusi. Pakazać, što Polšča, Eŭraźviaz, majuć vialiki dośvied i hatovyja im ź Biełaruśsiu padzialicca. Tamu my na hetaje spatkańnie, pryśviečanaje pryvatyzacyi, zaprasili ekspertaŭ ź Biełarusi. Nam padajecca, što ciapier dobry čas, kab biełaruskija kalehi sustrelisia z polskimi i ekspertami i admysłoŭcami z usiaho śvietu, abmianialisia dośviedam dy padumali razam nad tym, jak pravieści ŭ Biełarusi reformy. Reformy, jakija raniej ci paźniej i tak treba budzie pravieści».
Ideja prahramy «Eŭrapiejski dyjaloh na karyść madernizacyi Biełarusi» była zaprapanavanaja premjer-ministram Polščy Donaldam Tuskam, jaje padtrymali u Eŭraźviazie a 29 sakavika sioleta pra paŭstańnie prahramy abviaściŭ kamisar EZ u pytańniach pašyreńnia i palitycy dobrasusiedztva Štefan Fiule.
Planujecca, što padobnyja kanferencyi na roznyja temy, pieradusim niepalityčnyja, buduć adbyvacca rehularna ŭ stalicach krainaŭ Eŭraźviazu. Jak stała viadoma našamu radyjo, tema nastupnaj kanferencyi — ekalohija.
Pa vynikach kanferencyjaŭ budzie vydadzieny admysłovaja kniha, jakaja, jak spadziajucca arhanizatary, moža stać svojeasablivym dapamožnikam pry praviadzieńni reformaŭ u Biełarusi.
