Jak paviedamiła načalnik upraŭleńnia farmaceŭtyčnaj inśpiekcyi i arhanizacyi lekavaha zabieśpiačeńnia Ministerstva achovy zdaroŭja Ludmiła Ravuckaja,
kala dvuch tydniaŭ tamu viedamstva nakiravała list u Saviet ministraŭ z prapanovaj unieści adpaviednyja papraŭki ŭ zakon «Ab rekłamie». Na jaje dumku, zabarona rekłamy ŭ ŚMI aharodzić hramadzian Biełarusi ad bieskantrolnaha samalačeńnia.
U svaju čarhu ekśpiert rekłamnaha rynku Piotr Papiałuška, vykanaŭčy dyrektar hrupy kampanij Starcom MediaVest, ličyć, što novaŭviadzieńnie naniasie značny ŭron ajčynnym vytvorcam lekavych srodkaŭ, a taksama ŚMI.
Śpiecyjalist padkreśliŭ, što zabarona rekłamy lekaŭ vyhadnaja najpierš tym vytvorcam, pradukcyja jakich užo dobra viadomaja. Takim čynam, adznačyŭ Papiałuška, budzie abmiežavanaja mahčymaść vypusku na rynak novych preparataŭ i heta niehatyŭna adabjecca na roście realizacyi ajčynnych preparataŭ. Taksama, ličyć ekśpiert, pacierpiać ŚMI: rekłama lekavych srodkaŭ składaje značnuju dolu rynku, i jaje zabarona pamienšyć dachody telekanałaŭ. Adpaviedna pamienšacca mahčymaści ŚMI kuplać abo stvarać jakasnyja prahramy.
Papiałuška taksama nie zhodny z zajavaj Ministerstva achovy zdaroŭja, što zabarona rekłamy lekavych srodkaŭ u ŚMI spryjalna adabjecca na zdaroŭi nasielnictva. Jon nahadaŭ, što siońnia ŭ ŚMI dazvolena tolki rekłama lekaŭ, jakija možna kupić biez recepta ŭrača — pabočnyja efiekty ŭ takich preparataŭ mohuć być vielmi niaznačnymi. Akramia taho, kožnuju rekłamu ŭzhadniaje Ministerstva achovy zdaroŭja, jakoje maje prava ŭbrać ź jaje ŭsie niedakładnyja abo niepravieranyja śćviardžeńni. «Składvajecca ŭražańnie, što Ministerstva achovy zdaroŭja choča źmienšyć sabie pracu», — zaklučyŭ Papiałuška.
