U Mižnarodnym valutnym fondzie miarkujuć, što Biełarusi nieabchodna piensijnaja reforma, zajaviła 30 sakavika žurnalistam pastajanny pradstaŭnik MVF u Biełarusi Natalija Kaladzina.
«Biezumoŭna, heta patrabujecca. Demahrafičnaja situacyja ŭ Biełarusi niespryjalnaja, nasielnictva stareje. Piensijnyja vydatki nie pavinny stać niepadjomnaj nošaj dla ekanomiki, i tamu piensijnaja reforma nieabchodnaja», — zaznačyła Kaladzina ŭ intervju pradstaŭnikam ŚMI napiaredadni adjezdu ź Biełarusi ŭ suviazi z zakančeńniem svaich paŭnamoctvaŭ.
Jana zaznačyła, što piensijnaja sistema nasamreč mocna ŭzajemaźviazana ź dziejnaściu realnaha siektara ekanomiki.
«Uznosy ž u piensijny fond, jakija siońnia vypłačvajuć biełaruskija pracadaŭcy, heta faktyčna padatak, vieličynia jakoha ŭpłyvaje na kankurentazdolnaść pradpryjemstvaŭ», — padkreśliła Natalija Kaladzina.
Jana źviarnuła ŭvahu, što piensijny viek u Biełarusi ŭstanoŭleny na paraŭnalna nizkim uzroŭni.
«Piensijny viek, jaki zachoŭvajecca ŭ Biełarusi (55 hadoŭ dla žančyn, 60 hadoŭ dla mužčyn) — adzin z samych nizkich u rehijonie. Mahu skazać jak žančyna, što takaja dyskryminacyja nieapraŭdanaja», — miarkuje pastajanny pradstaŭnik MVF u Biełarusi.
«Ułady viedajuć, što reformy ŭ hetym kirunku treba rabić, — dadała jana. — Pytańnie ŭ tym, jak ich pravieści z najmienšymi sacyjalnymi vydatkami».