Nasta Pałažanka (sprava) i Śviatłana Kalinkina stali łaŭreatkami premii imia Śviatłany Navumavaj, belradio.fm
Praz adsutnaść dakumienta jon nie moža ažanicca. Pra akaličnaści spravy i vynik sustrečy ź im advakata raskazała niaviesta Źmitra Nasta Pałažanka.
«Naša Niva»: Vy atrymali list ad Źmitra, pieršy paśla jaho trochtydniovaha znachodžańnia ŭ ŠIZA. Pra što jon?
Nasta Pałažanka: Napisaŭ, kab nie chvalavałasia. Usio, što nakanavana vytryvać, jon vytryvaje. Ale adznačyŭ,
što spačatku niedaacaniŭ uzrovień maralnych ździekaŭ, praź jakija davodzicca prachodzić mnohim palitviaźniam, — sistema «ŭdaskanalvajecca».Ale list badziory. Chacia zaŭvažna, što jon rychtujecca da dalejšych prablemaŭ.
«NN»: Jon izalavany ŭ kałonii?
NP: Tak. Źmicier znachodzicca ŭ pamiaškańni kamiernaha typu. Zrešty, chutka znoŭ mohuć viarnuć u ŠIZA. 1 sakavika ź im sustrakałasia advakatka. Jany razmaŭlali ŭ daloka nie kanfiedycyjnaj abstanoŭcy. Abmiarkoŭvali pytańni vyklučna jurydyčnaha charaktaru. Jamu nielha było raskazać nie tolki pra naviny ŭ krainie, ale navat pra pobyt jaho taty.
«NN»: Maci Eduarda Łobava i žonka Źmitra Bandarenki zajavili, što palitviaźniaŭ žorstka abmiežavali ŭ temach, na jakija im možna pisać. Pa apošnim liście Źmitra nie adčuli padobnaha?
NP: Nie. My i tak nie ŭsio abmiarkoŭvajem u listach, kab jany dachodzili. Ale voś toje, što z advakatam stała nastolki stroha, to heta situacyja ŭźnikła ŭ apošni miesiac.
«NN»: U Źmitra sioleta skančajecca termin źniavoleńnia. Jon pra heta ŭzhadvaje?
NP: U turmie žyvieš, jak praviła, siońniašnim dniom. I my baimsia, kab hety termin nie pavialičyŭsia. My jaho, biezumoŭna, čakajem doma, ale jon i sam nie vyklučaje mahčymaści novaj kryminalnaj spravy.
Ja čakaju, što ŭ krainie niešta zvaruchniecca i ja pabaču jaho raniej, ci, prynamsi, nie paźniej, čym praz 9,5 miesiaca.
«NN»: Pašpart Źmitru tak i nie pierasłali ŭ kałoniju?
NP: Nie. Budziem padavać u sud na supracoŭnikaŭ KDB, bo za paŭhoda tolki na adno chadajnictva byŭ adkaz. My patrabavali, kab z KDB pašpart Źmitra pierasłali ŭ kałoniju. U adkazie havaryłasia, što pašpart kanfiskavany ŭ miežach kryminalnaj spravy i znachodzicca ŭ KDB, budzie nakiravany zhodna z normami zakanadaŭstva. Ale pavodle jakoha zakanadaŭstva, u jakija terminy — ni słova. My pačali pisać u Hienprakuraturu. Ale adtul usio pieranakiroŭvali ŭ KDB — taki biermudski trochkutnik: nivodnaha adkazu.