U Rasii žyvuć 512 tysiač biełarusaŭ 7

Pavodle źviestak apošniaha pierapisu nasielnictva, jaki prajšoŭ u 2010 hodzie, u Rasijskaj Fiederacyi žyvuć 512 tysiač biełarusaŭ. Pra heta paviedamiŭ kiraŭnik fiederalnaj nacyjanalna-kulturnaj aŭtanomii «Biełarusy Rasii», davieranaja asoba kandydata ŭ prezidenty RF Uładzimira Pucina, piśmieńnik Valeryj Kazakoŭ.

Za dziesiać hadoŭ dahetul, dadaŭ jon, biełarusaŭ było ŭ Rasii 832 tysiačy, a dvaccać hadoŭ tamu — 1,2 miljona.

«Kali tak i dalej pojdzie, biełaruskaja samaidentyfikacyja ŭ Rasii źniknie, — kanstatavaŭ jon. — I heta nie tolki prablema biełarusaŭ, jakija žyvuć u Rasii, ale i prablema biełaruskich uładaŭ. Kab adčuvać siabie bolš-mienš kamfortna, vychadcy ź Biełarusi pierastajuć identyfikavać siabie jak biełarusy i stanoviacca etnasam».

Na dumku Kazakova, u Biełarusi pavinna być dziaržaŭnaja prahrama padtrymki dyjaspary, pavinny być dziaržinstytuty, čyja dziejnaść była b na heta skiravanaja. «Dziakuj Bohu, urad Biełarusi pačynaje sioleta budaŭnictva „Biełaruskaha doma“ ŭ Maskvie, — paviedamiŭ kiraŭnik nacyjanalna-kulturnaj aŭtanomii, — ź jaho budaŭnictvam my ŭžo spaźnilisia na dvaccać hadoŭ. Pry takim padychodzie praź dziesiać hadoŭ, ja bajusia, u Rasii zastanucca 300 tysiač biełarusaŭ».

Pavodle słoŭ Kazakova,

arhanizacyi biełaruskaj dyjaspary pracujuć na samadziejnym uzroŭni.

Jon upeŭnieny, što biełaruskaja dziaržava pavinna prajaŭlać uvahu da svaich suajčyńnikaŭ: «Dapamahać tak, jak niemcy, izrailcianie, palaki dapamahajuć svaim. Pryčym heta nie tolki finansavaja (chacia i heta nieabchodna), ale i etnakulturnaja dapamoha, tym bolš što ŭ Rasii isnujuć zakony, jakija dajuć mahčymaści dla takoj pracy».

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH