Prodaž novych aŭtamabilaŭ u 2012 hodzie ŭ paraŭnańni ź minułym moža skaracicca na 25%, prahnazuje staršynia praŭleńnia Biełaruskaj aŭtamabilnaj asacyjacyi (BAA) Siarhiej Michnievič.
Pavodle źviestak BAA,
u 2011 hodzie abjom prodažu novych aŭtamabilaŭ (z ulikam rasijskich i impartnych brendaŭ) skłaŭ 16 tysiač 275 mašyn. «Ale sioleta dobra, kali aŭtadyleram udasca pradać 12 tysiač novych aŭtamabilaŭ», — skazaŭ Michnievič napres-kanfierencyi ŭ Minsku 9 lutaha.
Adna z asnoŭnych pryčyn prahnazujemaha padzieńnia rynku novych aŭtamabilaŭ — admiena lhoty pa PDK pry ŭvozie i realizacyi aŭtamabilaŭ jurasobami i pradprymalnikami. Hetaje novaŭviadzieńnie zamacavana va ŭkazie kiraŭnika dziaržavy № 36, jaki nabyŭ moc u studzieni hetaha hoda. Ukaz admianiŭ raniejšy paradak źbirańnia PDK z vykarystańniem u jakaści padatkovaj bazy roźnicy pamiž canoj nabyćcia i canoj realizacyi aŭtamabila praz dylerskija sietki. Padatkovaj bazaj dla padliku PDK ciapier źjaŭlajecca ŭvieś košt aŭtamabila.
Pavodle słoŭ Michnieviča,
«kali b nie ŭkaz № 36, to, zhodna z prahnozami aŭtadyleraŭ, rynak novych aŭtamabilaŭ sioleta pieravysiŭ by 20 tysiač novych aŭtamabilaŭ» (rost na 25%). Zamiest hetaha čakajecca padzieńnie rynku na tyja ž 25%, najpierš u suviazi z rostam cen na novyja aŭtamabili prykładna na 15–16%z-za admieny lhoty pa PDK, padkreśliŭ jon.
Michnievič pierakanany, što ad uviadzieńnia ŭkaza dziaržava hublaje bolš, čym nabyvaje. Skaračeńnie ŭvozu novych inšamarak pryviadzie da skaračeńnia mytnych pastupleńniaŭ, PDK, padatkaŭ, jakija spadarožničajuć dachodam bankaŭ i strachavych kampanij. «I heta adzin z našych arhumientaŭ, jakija paćviardžajuć nieabchodnaść pierahledzieć staŭku PDK na ŭvoz i realizacyju aŭtamabilaŭ», — adznačyŭ kiraŭnik BAA.
U asacyjacyi ličać adekvatnym ustanavić staŭki PDK na aŭtamabili, jakija ŭvoziacca, na ŭzroŭni 10%. «My źviartalisia z hetym pytańniem u Ministerstva pa padatkach i zborach, adnak nam adkazali, što aŭtamabili — heta nie pradmiet pieršaj nieabchodnaści, tamu indyvidualnych stavak pa PDK dla aŭtamabilaŭ ministerstva nie bačyć nieabchodnaści razhladać», — paviedamiŭ Michnievič.
Kab niejak nivieliravać rost cen, aŭtadylery pačali pieramovy z aŭtavytvorcami pa źnižeńni zakupačnaha koštu. Adnak pa niekatorych madelach, u tym liku tych, na jakija isnujuć kvoty dla Biełarusi, «šansy atrymać cenavyja pasłableńni minimalnyja». «Zavodu budzie bolš vyhadna pradać aŭtamabili na inšy rynak pa dziejnych cenach», — kanstatavaŭ ekśpiert.
