Hurt «Ili-ili» źniaŭ klip na pieśniu «Vosień jak viasna», a taksama padzialiŭsia navinami pra debiutny albom dy skareńnie kałužanaŭ.
Pieśnia napačatku była stvoranaja pa-rusku, adnak paźniej chłopcy pierapisali jaje i moŭna, i muzyčna. Uvosień «v.v.» vyjšła z zaścienkaŭ studyi.
«U novym varyjancie jana nas natchniała kudy bolej. Kali Mitryj Siamionaŭ-Alejnikaŭ, naš siabra i režysior debiutnaha klipu "Kurortnyj romans", vypadkova spytaŭ, ci jość u nas niejkaja pieśnia pra vosień, bo ŭ jaho daŭno jość ideja videa, usio niejak i supała. Praŭda, paśla ideja znajšłasia jašče cikaviejšaja i jana sama saboju raźvivałasia. Dy naprykancy klip atrymaŭsia bolš šmatznačnym,čym zadumvaŭsia. Praces zdymak byŭ ciažkavaty,bo ŭ Biełarusi vielmi chałodna ŭ listapadzie biehać pa palach u adnym stroi. Adnak toje, što atrymałasia, zaraz nas hreje», — raspaviali Generation.by muzyki.
Pieśnia «v.v.» zapisanaja na studyi Sunflowers z hukarežysioram Vitalem Kuleŭskim. Ź im ža «Ili-ili» ciapier pracujuć nad svaim debiutnym albomam.
«Nieviadoma pakul, ci ŭvojdzie "v.v." u albom, bo jon atrymoŭvajecca ruskamoŭnym, ale idejna pieśnia padychodzić. Z pryčyny zapisu my pakul nie planujem vialikaha kancertu, chočacca zasiarodzicca na stvareńni płytki. Ale, mahčyma, zładzim niešta nakštałt kvaterniku ŭ "La Mora"».
Tym časam inšaja pieśnia hurta «V ijule» litaralna na dniach pieramahła ŭ konkursie kałužskaha radyjo «40rok». Ciapier kałužanie buduć słuchać biełarusaŭ u «haračaj» ratacyi. Darečy, hetuju ž pieśniu «Ili-ili» vykonvali pry zdymkach biełaruskaha seryjału «Vyšej nieba», što nieŭzabavie vyjdzie na teleekrany.
