Nahodaj dla zvarotu pravaabarončaha hramadskaha abjadnańnia «Biełaruski Chielsinski kamitet» u Hienieralnuju prakuraturu stała infarmacyja, ahučanaja žonkaj eks-kandydata ŭ prezidenty Andreja Sańnikava Irynaj Chalip na pres-kanfierencyi ŭ Minsku 25 studzienia.
Chalip, u pryvatnaści, raskazała: padčas spatkańnia ŭ viciebskaj kałonii «Vićba-3» 24 studzienia muž paviedamiŭ joj, što pad uździejańniem katavańniaŭ vymušany byŭ napisać na imia Łukašenki prašeńnie ab pamiłavańni. Pavodle słoŭ Chalip, z 16 pa 20 listapada z Sańnikavym, jaki ŭ toj čas znachodziŭsia na pierasyłcy ŭ mahiloŭskaj turmie, adbyvałasia «štości žudasnaje». U vyniku 20 listapada jon vymušany byŭ padać prašeńnie ab pamiłavańni. Pakolki reakcyi na prašeńnie nie było dahetul, a Alaksandr Łukašenka na pres-kanfierencyi 23 śniežnia zajaŭlaŭ, što Sańnikaŭ da jaho z prośbaj ab pamiłavańni nie źviartaŭsia, Chalip apasajecca za žyćcio svajho muža.
BCHK prosić Hienprakuraturu pravieści pravierku infarmacyi ab katavańni nad Sańnikavym i dać publičnuju infarmacyju pa jaje vynikach i, a ŭ vypadku nieabchodnaści — raspačać miery prakurorskaha reahavańnia.
«Pakolki Andrej Sańnikaŭ znachodzicca ŭ niavoli, i jaho mahčymaści abaraniać svaje pravy, raspaŭsiudžvać infarmacyju niepasredna zaležać ad administracyi (kałonii. — BiełaPAN.), varta zychodzić z prezumpcyi davieru da źviestak ab parušeńni pravoŭ, jakija ŭtrymlivajucca ŭ skarhach jaho abo jaho pradstaŭnikoŭ i svajakoŭ. Adpaviedna dziaržava ŭ asobie svaich orhanaŭ niasie abaviazak asabliva ŭvažlivaj pravierki takich źviestak», — havorycca ŭ zvarocie BCHK.
Pravaabaroncy nahadvajuć Hienprakuratury, što, pavodle artykuła 7 Mižnarodnaha pakta ab hramadzianskich i palityčnych pravach, a taksama častki 3 Kanstytucyi Respubliki Biełaruś, "nichto nie pavinien źviedvać katavańni ci žorstkaje, niečałaviečaje ci prynižalnaje jaho hodnaść abychodžańnie ci pakarańnie".
Jak raniej paviedamlaŭ BiełaPAN, 30 studzienia sud Viciebskaha rajona pavinien razhledzieć skarhu advakataŭ Andreja Sańnikava na dziejańni administracyi kałonii «Vićba-3». Padstavaj dla skarhi stali nieadnarazovyja i, pavodle mierkavańnia advakataŭ, niezakonnyja admovy kiraŭnictva kałonii ŭ davańni im spatkańnia ź ich padabaronnym. Sańnikava trymali ŭ poŭnaj izalacyi ad navakolnaha śvietu z 8 listapada pa 20 studzienia.
Nahadajem, adzin z asnoŭnych sapiernikaŭ Alaksandra Łukašenki na vybarach 2010 hoda Andrej Sańnikaŭ u mai minułaha hoda byŭ pryhavorany da piaci hadoŭ pazbaŭleńnia voli ŭ kałonii ŭzmocnienaha režymu pa abvinavačańni ŭ arhanizacyi masavych biesparadkaŭ 19 śniežnia 2010 hoda. Adbyvać pakarańnie jon pavinien byŭ u kałonii Navapołacka (Viciebskaja vobłaść), adnak palityka niekalki razoŭ etapavali ŭ inšyja kałonii.
Mižnarodnaja hramadskaść ličyć Sańnikava palitźniavolenym i patrabuje ad aficyjnaha Minska jaho nieadkładnaha vyzvaleńnia.
