«Na źmienu «čarniłu» pryjduć vinahradnyja viny horšaj jakaści» 4

Kancern «Biełdziaržcharčpram» zajaŭlaje ab tym, što zavody pa vypusku pładova-jahadnych vinaŭ u hetym hodzie vymušanyja buduć pieraaryjentavacca na vytvorčaść inšaj pradukcyi. Jak hukniecca pradpryjemstvam heta novaŭviadzieńnie, i čym buduć paić narod vytvorcy «čarniłaŭ»?

— U hetym hodzie my praktyčna sydziem ad vytvorčaści ardynarnych vin ź vialikim utrymańniem zbožžavaha śpirtu, zastaniecca vytvorčaść vinaŭ palepšanych technałohij, u jakich da 10% śpirtu budzie naturalna zbrodžanaha, — pryvodzić BiełaPAN słovy staršyni kancerna «Biełdziaržcharčpram» Ivana Dančanki na pres-kanfierencyi ŭ Minsku 27 studzienia.

Dančanka ličyć, što vinzavody mahli b na miascovym syravinu pačać vytvorčaść balzamaŭ, likioraŭ, nastojek, biezałkaholnych napojaŭ, zamarožanaj sadaviny i jahad, sokaŭ. Pładovym vinarobstvam ŭ Biełarusi zajmajucca 60 pradpryjemstvaŭ roznaj formy ŭłasnaści.

U abjomie vyrablenaj pradukcyi vina-harełačnaha zavoda «Kołas» UP «DARORS» 95% zajmajuć pładova-jahadnyja viny. Na dumku dyrektara pradpryjemstva Siarhieja Siačko, uradu varta vyznačycca: zabaranić vytvorčaść pładova-jahadnych vinaŭ abo pakinuć usio, jak jość.

— Z adnaho boku, nam nichto ničoha nie zabaraniaje vyrablać. Ź inšaha — administracyjnym mietadam abłvykankamy ŭvodziać zony, svabodnyja ad pładova-jahadnych vinaŭ. Miniust pryznaŭ, što heta niezakonna. I vytvorcy mohuć biez prablem vyjhrać sudy, — upeŭnieny Siarhiej Siačko.

Pavodle jaho słoŭ, «čarnilnyja» zabarony pryviali da źnižeńnia abjomu prodažaŭ na 50%.

— Tym nie mienš, my ničoha nie stracili. Vyrablali kancentravanyja soki. Zrazumieła, što pładova-jahadnyja viny zadušać akcyzami. Tamu pryjdziecca vyrablać inšuju pradukcyju.

Na zavodzie zakuplena linija pa raźlivie vinahradnych vin, abstalavany cech dla kupažu. Patrabujucca dadatkovyja ŭlivańni ŭ pamiery 50 tysiač dalaraŭ, jakija pradpryjemstva płanuje atrymać z ułasnych resursaŭ.

— Kali jany chočuć vinahradnaje vino — jany jaho atrymajuć. Inšaje pytańnie, jakoj jakaści? U Biełarusi ž vinahradniki nie rastuć, — razvažaje dyrektar zavodu «Kołas». — Ja pamiataju, jakuju syravinu nam pastaŭlali z Kabardzina-Bałkaryi: ź sintetyčnymi farbavalnikami, z utrymańniem techničnaha śpirtu… Na moj pohlad, nie kožnaje vinahradnaje vino biełaruskaj vytvorčaści paraŭnajecca z pładova-jahadnym. U apošnich zabaronienyja aramatyzatary. Jany bolš naturalnyja.

Sam Siarhiej Siačko pładova-jahadnyja viny nie ŭžyvaje, addajučy pieravahu im šatłandski viski abo ajčynnyja sarakahradusnyja nastojki.

— Ale jak vytvorca ja viedaju, što hetyja viny pa jakaści ciapier lepšyja, čym u časy SSSR, — dzielicca vynikami ŭłasnaj dehustacyi surazmoŭca. — Pamiataju, što ŭ pładova-jahadnym 1984 hoda vypusku mahli niedahryzki płavać!

Jon ličyć, što «čarnilnyja» zabarony pituščy narod nie spyniać.

— Vy ž viedajecie, što narod ź vina pierachodzić na adekałon i samahonku z kurynym pamiotam, — reziumavaŭ dyrektar zavoda.

Ad pieraaryjentacyi na vinahradnyja viny, u pieršuju čarhu, pacierpiać sielskija žychary, miarkuje Siarhiej Siačko.

— My budziem za valutu kuplać u Małdavii vinamateryjał, a straciać našy sadoŭniki, jakim niama kudy budzie padzieć svaju pradukcyju. Ministerstva ekanomiki pavinna zakłapacicca, kab našy jabłyki i jahady nie zhnili i nie źnikli.

U minułym hodzie, pavodle źviestak Biełstata, biełarusy vypili 17 932 300 dał «čarniłaŭ», uklučajučy napoi vinnyja pładova-jahadnyja. A niekatoryja vytvorcy navat pastaŭlali pładovyja viny na ekspart. U ryžskaj kramie možna znajści biełaruskija «čarniły» pa rekordnaj canie — u pieraliku 99 000 biełaruskich rubloŭ!

0

0

0

0

0

0

Taćciana Pcicyna

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH