Pieršy namieśnik ministra ŭnutranych spraŭ — načalnik kryminalnaj milicyi MUS Biełarusi pałkoŭnik milicyi Aleh Piakarski byŭ zvolnieny z orhanaŭ unutranych spraŭ 16 studzienia 2012 hoda ŭkazam prezidenta z takoj ža farmuloŭkaj, jak i paŭmiesiaca tamu namieśnik kiraŭnika MUS — načalnik milicyi hramadskaj biaśpieki pałkoŭnik milicyi Jaŭhien Połudzień: u suviazi z učynieńniem pravinnaściaŭ, jakija dyskredytujuć zvańnie supracoŭnika orhanaŭ unutranych spraŭ.
Nahadajem, Jaŭhien Połudzień byŭ adpraŭleny ŭ adstaŭku i pieraviedzieny ŭ zapas Uzbrojenych sił užo paśla pradjaŭleńnia jamu abvinavačańnia va ŭčynieńni złačynstva, praduhledžanaha č. 3 art. 424 Kryminalnaha kodeksa (złoŭžyvańnie ŭładaj ci słužbovymi paŭnamoctvami).
Jak paviedamili BiełaPAN u Śledčym kamitecie Biełarusi, kryminalnaja sprava ŭ dačynieńni da Aleha Piakarskaha nie raspačynałasia. Nijakaj infarmacyi ab raspačynańni kryminalnaj spravy niama, zajavili BiełaPAN u centry infarmacyi i hramadskich suviaziaŭ KDB Biełarusi.
Nahadajem, na pasadu pieršaha namieśnika kiraŭnika MUS Piakarski byŭ pryznačany 4 śniežnia 2009 hoda. Da hetaha jon uznačalvaŭ hałoŭnaje ŭpraŭleńnie pa baraćbie z arhanizavanaj złačynnaściu MUS. Jašče raniej — upraŭleńnie pa narkakantroli i supraćdziejańni handlu ludźmi.
Čutki pra adstaŭku Piakarskaha źjavilisia ŭ siaredzinie śniežnia minułaha hoda paśla zatrymańnia Jaŭhiena Południa. Piakarski zhadvaŭsia ŭ źviazcy z namieśnikam ministra — načalnikam papiaredniaha rasśledavańnia MUS hienierał-majoram Siarhiejem Hurejevym, jaki nibyta padaŭ u adstaŭku. Ale tady išła havorka ab tym, što Piakarski sam napisaŭ prašeńnie ab adstaŭcy.
