U Minsku adkryŭsia kinafiestyval «Listapad» 3

XVIII Minski mižnarodny kinafiestyval «Listapad» adkryŭsia viečaram 5 listapada ŭ staličnym Pałacy Respubliki.

Pierad uračystaj cyrymonijaj adkryćcia kinafiestyvalu pa čyrvonaj dyvanovaj darožcy prajšli ŭdzielniki i hości «Listapada»: biełaruskija i zamiežnyja dziejačy kinamastactva, členy mižnarodnaha žury, stvaralniki filmaŭ — udzielnikaŭ kinaforumu.

Na cyrymonii adkryćcia ministr kultury Pavieł Łatuška začytaŭ pryvitańnie ŭdzielnikam fiestyvalu ad imia Alaksandra Łukašenki.

Prahramu «Listapada» adkryła kinakarcina «Alena» rasijskaha režysiora Andreja Źviahincava. Premjera filma adbyłasia na 64-m kinafiestyvali ŭ Kanach, dzie ŭdastoiłasia śpiecyjalnaha pryza «Asablivy pohlad».

Sioletni fiestyval sabraŭ kiniematahrafistaŭ bolš čym z 30 krain: Aŭstryi, Azierbajdžana, Armienii, Biełarusi, Bielhii, Bałharyi, Brazilii, Vienhryi, Hiermanii, Hruzii, Izraila, Italii, Kyrhyzstana, Łatvii, Mieksiki, Manholii, Niderłandaŭ, Polščy, Rasii, Rumynii, Sierbii, Słavakii, Tajłanda, Turcyi, Ukrainy, Filipin, Francyi, Charvatyi, Čechii, Šviecyi, Estonii, Paŭdniovaj Karei.

Akramia taho, u jakaści hanarovych haściej u kinafiestyvali ŭdzielničajuć takija artysty, jak Kachi Kaŭsadze, jaki syhraŭ rolu Abduły ŭ kinastužcy Uładzimira Matyla «Biełaje sonca pustyni», akcior, režysior i litaratar Vienijamin Śmiechaŭ i jaho dačka — aktrysa, śpiavačka i televiadučaja Alika Śmiechava, inšyja viadomyja dziejačy kultury.

Na forumie budzie pradstaŭlena kala 70 karcin.

Z 6 listapada pačnucca kinapakazy ŭ kinateatrach «Centralny», «Pieramoha», «Dom kino», «Pijanier», a taksama ŭ małoj zale Pałaca Respubliki i videakompleksie «Centr-videa».

«Listapad» — najbujniejšy kinaforum Biełarusi, na jaki štohod zaprašajucca prafiesijanały i amatary kiniematohrafa. Sioleta jon projdzie pa 12 listapada. Prahrama fiestyvalu składajecca z troch siekcyj: ihravoha, dakumientalnaha i dziciačaha kino.

U siekcyju ihravoha kino ŭklučany asnoŭny konkurs, u jakim udzielničajuć filmy z krain SND, Bałtyi, Uschodniaj i Centralnaj Jeŭropy, a taksama konkurs pieršych filmaŭ «Maładość na maršy», jaki pradstavić kalekcyju rabot maładych aŭtaraŭ z roznych krain.

Prahrama dakumientalnaha kino taksama składajecca z asnoŭnaha konkursu i konkursu maładoha kino.

U prahramu konkursu dla junych hledačoŭ «Listapadzik-2011», jaki adkryŭsia 4 listapada, uvajšli kinastužki dla dziaciej i junactva, pryziory i ŭdzielniki prestyžnych dziciačych mižnarodnych kinafiestyvalaŭ. U ramkach «Listapada» projdzie dastatkova šyrokaja prahrama pazakonkursnych pakazaŭ.

Zasnavalnikami kinafiestyvalu «Listapad» źjaŭlajucca Ministerstva kultury Biełarusi, Minharvykankam, Biełteleradyjokampanija, Nacyjanalnaja kinastudyja «Biełaruśfilm», a taksama «Biełaruski videacentr» i «Biełaruski sajuz kiniematahrafistaŭ».

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH