U Viciebsku prajšli zdymki sieryjała «Palavańnie na haŭlajtara» 4

U Viciebsku 30 kastryčnika prajšli zdymki frahmientaŭ vaśmisieryjnaha sieryjała «Palavańnie na haŭlajtara». U masavych scenach uziali ŭdzieł žychary horada, jakija prajšli papiaredni kastynh.

U sumiesnaj stužcy rasijskaj kinakampanii Star Media i «Biełaruśfilma» raskazvajecca pra likvidacyju hrupaj savieckich padpolščykaŭ Vilhielma Kube — kiraŭnika akupacyjnaj administracyi ŭ Biełarusi. Na ekrany film pavinien vyjści ŭ 2012 hodzie. Niahledziačy na toje što dziejańnie adbyvajecca ŭ Minsku ŭ 1943 hodzie, zdymačnaja hrupa pracavała nie tolki ŭ biełaruskaj stalicy, ale i ŭ inšych haradach — Breście i Babrujsku. U Viciebsku zdymki prachodzili ŭ histaryčnaj častcy horada, kala budynkaŭ № 27 i № 29 pa vulicy Suvorava. Heta byłyja dachodnyja damy, jany adnosiacca da pomnikaŭ architektury XIX stahodździa.

U siužecie vajennaj stužki režysiora Aleha Baziłava pieraplalisia histaryčny raman, vajenna-psichałahičnaja drama i luboŭnyja linii na fonie baraćby partyzanskaha padpolla z fašystkaj akupacyjaj u Biełarusi. Hałoŭnuju žanočuju rolu — padpolščycy Haliny Mazanik — vykonvaje viadomaja rasijskaja aktrysa Anastasija Zavaratniuk. U stužcy taksama zaniatyja Maryja Maškova, Alaksandr Dźjačenka, Łarysa Łužyna, Alaksandr Kašpieraŭ, Pavieł Trubinier i inšyja.

Jak raskazała kastynh-dyrektar akcioraŭ masavych scen «Biełaruśfilma» Łarysa Sierdziukova, žycharoŭ Viciebsku zaprašali dla vykanańnia rolaŭ niamieckich sałdat i aficeraŭ, a taksama mirnych haradžan. Praca akcioraŭ-«masavikoŭ» aceńvajecca ŭ 50 tysiač biełaruskich rubloŭ u dzień. Na kastynh prychodzili navat prafiesijnyja viciebskija akciory — rabotniki miascovaha dramteatra. Adnamu ź ich kastynh-dyrektar była vymušana admović — typaž mužčyny byŭ zanadta fakturnym i jarkim dla masavaj sceny.

Pavodle słoŭ Sierdziukovaj, dziaŭčat dla masoŭki ŭ vajennym filmie adbirali tolki tych, u kaho naturalny koler vałasoŭ, pryčoska biez hryŭki, niama jarkaha makijažu, nakładnych paznohciaŭ i h.d. Mužčyn na rolu niemcaŭ šukali z aryjskim typam źniešnaści — vysokich, sa śvietłymi niadoŭhimi vałasami.

U niekalkich scenach sieryjała, źniatych u Viciebsku, uziała ŭdzieł Anastasija Zavaratniuk.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH