Minskija fitnes-kłuby prapanujuć svaim naviednikam samyja raznastajnyja pasłuhi. Tamu kožny prychilnik zdarovaha ładu žyćcia moža znajści «svoj» zaniatak u zaležnaści ad pastaŭlenaj mety, stanu zdaroŭja i biudžetu. Aby było žadańnie i hrošy.
Pra hrošy
Što da apošniaha, to, u adroźnieńnie ad cenaŭ na charčavańnie, zaniatki ŭ fitnes-kłubach padaraželi niaznačna. Naprykład, kali viasnoj abaniemient na aerobiku ŭ «Bodzi-ciuninhu» kaštavaŭ 120 tysiač rubloŭ, to ciapier — 135 tysiač.
Abaniemienty na miesiac (8 zaniatkaŭ) tańniejšyja ŭ kłubach sa spalnych rajonaŭ. Naprykład, abaniemient na piłates u «DeMiry» kaštuje 110 tys. rubloŭ. Kab pryvabić novych naviednikaŭ, fitnes-kłuby ładziać raznastajnyja akcyi, pranujuć niekalki napramkaŭ u adnym abaniemiencie.
U kłubie «90-60-90» za 140 000 vy možacie dvojčy na tydzień naviedvać lubyja zaniatki na vybar: ad akvaaerobiki da johi. A ŭ N-Fitness i Panatta Sport u abaniemient na aerobiku (250 tysiač rubloŭ) uvachodzić naviedvańnie saŭny paśla zaniatkaŭ.
Vierchniaja miaža cenaŭ zaležyć ad prestyžu kłuba, kvalifikacyi. Naprykład, fitnes-kłub «Alisa-star» maje niekalki załaŭ. Zaniatki aerobikaj kaštujuć 160 tysiač u zale na praśpiekcie Niezaležnaści ci 120 tysiač — u adnym sa spalnych rajonaŭ.
Takija ustanovy, jak «Śviet fitnesu» ci «Vełnes kłub» pry «Ekamiedservisie» pracujuć pa «kłubnaj» schiemie. Nabyŭšy abamient, vy možacie naviedvać lubyja zaniatki ŭ luby čas, a taksama saŭnu z basiejnam. Pierad hetym vas abaviazkova ahledzić urač i vyniesie vierdykt, što karysna, a što — nie dla vašaha zdaroŭja.
Pra napramki
Kab vyśvietlić, čym adroźnivajucca pamiž saboj fitnes-prahramy, my źviarnulisia da instruktaraŭ minskich kłubaŭ.
Aerobika ŭjaŭlaje saboj enierhičnyja praktykavańni pad muzyku. Na siońnia isnujuć tancavalnaja, step, tajbo (z elemientami boksa) i inšyja vidy aerobiki. Heta davoli intensiŭny vid nahruzak. Nie ŭsie mohuć vytrymać taki rytm zaniatkaŭ. Tamu kali ŭ vas słaboje serca, dychalnaja sistema, to zajmacca budzie paprostu ciažka. Zaniatki aerobikaj supraćpakazany pry varykoznym pašyreńni vien, prablemach z kaleniami.
Zaniatki akva-aerobikaj — pa sutnaści, tyja ž praktykavańni, ale vykonvajucca ŭ vadzie. Tamu ličacca lahčejšymi, prynamsi, mienš traŭ-matyčnymi. Šyroka raspaŭsiudžana akvaaerobika dla ciažarnych.
Zadača šejpinhu — skarektavać tak zvanyja «prablemnyja miescy» cieła, jakija znachodziacca zvyčajna ŭ vobłaści žyvata dy ściohnaŭ. Heta kompleks praktykavańniaŭ, jakija paśladoŭna ŭździejničajuć na roznyja hrupy myšcaŭ. A efiekt dasiahajecca šlacham šmatrazovaha paŭtareńnia praktykavańniaŭ.
Zaniatki kałanetykaj i piłatesam prachodziać u bolš pavolnym tempie. U kałanetycy šmat praktykavańniaŭ, zapazyčanych z baleta. Zaniatki kałanetykaj, aproč inšaha, palepšać pastavu, zrobiać jaje bolš «baletnaj». Adnak kali ŭ vas drenny zrok ci chvoryja pazvanki, lepš papiarednie prakansultavacca z doktaram.
Piłates časta nazyvajuć treniroŭkaj biez nastupstvaŭ. Ličycca, što aŭtar hetaj mietodyki, Džozef Piłates, mienavita takim šlacham pieraŭtvaryŭsia z chvaravitaha chłopčyka ŭ prafiesijnaha spartsmiena i vykładčyka fizkultury. Praktykavańni vykonvajucca vielmi pavolna. Heta vymahaje kancentracyi ŭvahi na tym, što vy robicie. U hetym i jość sutnaść «treniroŭki z dapamohaj mozhu». Piłatesam možna zajmacca tym, kamu inšyja napramki nie pasujuć pa stanie zdaroŭja.
Bodzifleks — heta dychalnaja himnastyka. Praktykavańni vykonvajucca ŭ spałučeńni sa śpiecyjalnym piacietapnym dychańniem. Jon dazvalaje nasycić kisłarodam tyja myšcy, jakija zadziejničany ŭ dadzieny momant.
Takim čynam, vybirajcie sabie zaniatak pa dušy i ajda za zdaroŭjem i pryhažościu ŭ fitnes-kłub. Udarym fitnesam pa kryzisie!
* * *
Razabracca ŭ napramkach dapamahali instruktary Valancina (aerobika, kałanetyka i taj-bo, fitnes-kłub «Bodzi-ciuninh») i Dzijana (piłates, bodzifleks i kałanetyka «Vełnes-kłub «Ekamiedservisa»).
