Rašeńni ab kredytach MVF prymaje na padstavie ekanamičnych pryčyn 6
Zajaviŭ kiraŭnik biełaruskaha praŭdstaŭnictva AAN
Rašeńnie ab kredytavańni toj ci inšaj krainy Mižnarodny valutny fond prymaje na padstavie nie palityčnych, a ekanamičnych pryčyn. Pra heta zajaviŭ 24 kastryčnika na pres-kanfierencyi ŭ Minsku Antonius Bruk, kiraŭnik biełaruskaha pradstaŭnictva Arhanizacyi Abjadnanych Nacyj, u strukturu jakoj uvachodzić MVF.
Na prośbu žurnalistaŭ prakamientavać zajavu biełaruskaha boku ab tym, što ŭ pytańni vydzialeńnia Biełarusi kredytu jość palityčny matyŭ, Bruk skazaŭ: «Va ŭradaŭ krain — členaŭ MVF mohuć być palityčnyja matyvy, ale, tym nie mienš, fond prymaje svaje rašeńni na padstavie pryčyn ekanamičnych».
Kiraŭnik pradstaŭnictva AAN adznačyŭ, što ŭmovy, jakija vystaŭlaje MVF, adkryta vykładzieny ŭ rekamiendacyjach i zaklučeńniach fondu. «Tyja ŭmovy, jakija vystaŭlalisia, — u pryvatnaści praviadzieńnie reform bankaŭskaha siektara i pašyreńnie mahčymaściaŭ pryvatnaha siektara ŭ Biełarusi — nie byli poŭnaściu vykanany. Heta taksama možna nazvać palityčnym matyvam», — ličyć Bruk.
U toj ža čas jon padkreśliŭ: MVF, jak i inšyja instytuty AAN, u tym liku Mižnarodny bank rekanstrukcyi i raźvićcia (Suśvietny bank) i Jeŭrapiejski bank rekanstrukcyi i raźvićcia, «hatovy supracoŭničać ź Biełaruśsiu, hatovy da pahłybleńnia dyjałohu i partniorskich adnosinaŭ».
***
Treba adznačyć, što anałahičnuju zajavu zrabiŭ 17 kastryčnika kiraŭnik misii MVF u Biełarusi Krys Džarvis. Na pres-kanfierencyi ŭ Minsku jon padkreśliŭ, što MVF nie stavić nijakich palityčnych umoŭ. «Pierš čym prapanoŭvać prahramu, my pavinny pierakanacca, što vykanaŭčyja dyrektary padtrymajuć jaje, a vykanaŭčyja dyrektary pradstaŭlajuć krainy — členy fondu, jakich bolš za 180. Adnak padčas pieramoŭ my zajmajemsia vyklučna ekanamičnymi pytańniami», — skazaŭ Džarvis.
Ale kiraŭnik praŭleńnia Nacyjanalnaha banka Nadzieja Jermakova na pres-kanfierencyi 20 kastryčnika zajaviła: atrymańnie kredytu MVF abciažarvajecca z-za palityčnych matyvaŭ. Pavodle jaje słoŭ, misija fondu stanoŭča acaniła zachady, jakija robić urad i Nacbank pa stabilizacyi situacyi ŭ ekanomicy, adnak, «mahčyma, kredytu MVF i nie budzie». «Navat kali my na 100% usio vykanajem (umovy dla pačatku kredytnaj prahramy. — BiełaPAN.), zastajucca palityčnyja momanty — i heta hałoŭny faktar va ŭzajemaadnosinach z MVF», — skazała Jermakova. Jana, u pryvatnaści, dadała, što pradstaŭniki MVF nie ŭtojvajuć svaich patrabavańniaŭ ab vyzvaleńni palitźniavolenych.
Nahadajem, Biełaruś prosić u MVF čarhovy kredyt ad 3,5 da 8 młrd. dołaraŭ.
