Baranavicki aktyvist Ryhor Hryk padaŭ 24 kastryčnika zajaŭku na pikiet «Ab nievykanańni Baranavickim harvykankamam, haradskim sudom i milicyjaj Zakona RB ab respublikanskich i miascovych schodach».
Arhanizatar choča pravieści pikiet 12 listapada, ad 14.00 da 15.00, u starym parku pa vulicy Kamsamolskaj. Mierkavanaja kolkaść udzielnikaŭ — 15 čałaviek.
Pa słovach Ryhora Hryka, jon choča prainfarmavać žycharoŭ horada ab tym, što, na jaho pohlad, vykanaŭčaja ŭłada Baranavič, haradski sud i milicyja nie vykonvajuć biełaruskaje zakanadaŭstva. U Baranavičach užo asudzili troch aktyvistaŭ, jakija zaklikali pryjści na Narodny schod, a Viktara Mieziaka, kiraŭnika haradskoj inicyjatyŭnaj hrupy Narodnaha schoda, pryciahnuli da administracyjnaj adkaznaści dvojčy. Na dumku Hryka, aktyvistaŭ sudziać nie pa zakonie ab Respublikanskich i miascovych schodach, jaki dazvalaje pravodzić schody biez dazvołu vykankamaŭ, a za parušeńnie Zakona ab masavych mierapryjemstvach i pikietavańniach.
«Mnie chočacca źviarnuć uvahu na hetuju supiarečnaść u zakanadaŭstvie», — tłumačyć Ryhor Hryk.
Nahadajem, što ad 10 lipienia Baranavicki harvykankam nie daŭ dazvołu ni na adzin z bolš dziesiaci pikietaŭ, zajaŭki na jakija padavali dziejačy apazicyi.
