Juryst Volha Smalanka źviarnuła ŭvahu na toje, što zakonaprajekty ŭtrymlivajuć nadta šyrokija farmuloŭki, a heta dazvalaje advolna traktavać zakon. I najbolš prablemnymi, na jaje pohlad, źjaŭlajucca źmieny ŭ Zakon «Ab hramadskich abjadnańniach», Zakon «Ab palityčnych partyjach» i ŭ Kryminalny kodeks. U pryvatnaści,
pry atrymańni zamiežnaj dapamohi praduhledžvajecca pakarańnie terminam da dvuch hadoŭ pazbaŭleńnia voli.
Navat kali hetaja dapamoha atrymlivajecca na praviadzieńnie sieminaraŭ. Pryčym u tekście zakonaprajekta nie ŭkazanyja ni mety sieminaraŭ, ni ich temy.
U Kodeksie ab administratyŭnych pravaparušeńniach chočuć zamacavać adkaznaść za publičnyja zakliki da arhanizacyi i praviadzieńnia mitynhaŭ, schodaŭ, šeściaŭ, demanstracyj. «Schody ž — heta sumiesnaja prysutnaść hramadzian dla kalektyŭnaha abmierkavańnia i vyrašeńnia pytańniaŭ, jakija tyčacca ich intaresaŭ, — skazała Volha. — Heta aznačaje, što
luboje zaprašeńnie praz Fejsbuk da praviadzieńnia schodu pa abmierkavańni peŭnaha pytańnia moža stać padstavaj dla pryciahnieńnia da administratyŭnaj adkaznaści».
Pa słovach Smalanki, pa razhladajemych zakonprajektach,
lubaja dapamoha zamiežnaj dziaržavie, zamiežnaj arhanizacyi albo ich pradstaŭnikam, jakija nanosiać škodu nacyjanalnaj biaśpiecy, rasceńvajecca jak zdrada radzimie, što praduhledžvaje pakarańnie da 15 hadoŭ pazbaŭleńnia voli.
Pravaabaronca Valancin Stefanovič adznačyŭ, što źmieny ŭ Zakon «Ab hramadskich abjadnańniach» praduhledžvajuć adkaznaść za dziejnaść arhanizacyj, jakija spryjajuć atrymańniu lhot hramadzianam RB ŭ zamiežnych dziaržavach pa nacyjanalnych ci relihijnych prykmietach.
«Tut tłumačyć ničoha nie treba — prostaja anałohija z «kartaj palaka».
Staršynia Biełaruskaha Chielskinskaha kamiteta Aleh Hułak vykazaŭsia ab rychtavanych źmienach u Zakon «Ab orhanach dziaržaŭnaj biaśpieki». Jon źviartaje ŭvahu na toje, što ni z ekranaŭ televizaraŭ, ni praź inšyja ŚMI nie išło abmierkavańnie prablemy niedachopu mahčymaściaŭ u orhanaŭ dziaržaŭnaj biaśpieki prymianiać śpiecrodki, bajavuju techniku, zbroju. Nidzie nie hučała, što «žyćcio patrabuje pašyreńnia ich kampietencyi».
«Zakon nakiravany nie na abaronu hramadzian ad teraktaŭ, što było b łahična paśla krasavickich padziej. Orhany dziaržbiaśpieki „zatočvajucca“ na baraćbu z palityčnymi apanientami», — zajaviŭ Hułak.
