Poł Sajman pieratvaryŭsia ŭ adzin z asnoŭnych simvałaŭ amierykanskaj pop-muzyki jak tolki ŭ pačatku 60-ch razam z Artam Harfankiełam napisaŭ pieśniu Sound of Silence. The Beatles u paraŭnańni z Sajmanam padalisia nadta hučnymi i prostymi, a Bob Dyłan — «zanadta razumnym». Sajman i Harfankieł pačali z chutkaściu fordaŭskaha kanviejera vydavać z adnaho boku vielmi asabistyja, a ź inšaha — suśvietnyja chity na ŭsie časy. Pry hetym rola Arta Harfankieła była nie asnoŭnaj — žurnalisty lubili zapytacca, čym ułasna zajmajecca Harfankieł padčas pracy ŭ studyi.
Adnak pieśni, jakija stvaryŭ duet, stali najlepšaj soft-muzykaj60-ch. Mrs. Robinson — niekatoryja nie asabliva daśviedčanyja ludzi i dahetul upeŭnienyja, što hetuju pieśniu napisali The Beatles. El Condor Pasa — etničnaja miełodyja, jakuju abaviazkova ŭklučajuć u zbornik «Najlepšyja instrumientalnyja miełodyi śvietu» u rukach Poła Sajmana pieratvaryłasia ŭ kranalnuju asabistuju spoviedź. Bridge Over Troubled Water — fartepijannyja vadaspady i tekst pieśni, napisanaj śpiecyjalna dla vakała Arta Harfankieła, zadali taki ŭzrovień napisańnia pieśniaŭ pra kachańnie i ŭzajemnuju padtrymku, što paśla jaje možna było ničoha bolej nie zapisvać. Richard Cory — bałada pra toje, što być miljanieram nie tak užo i viesieła. Pry hetym navat palityčnyja pieśni Sajmana nieśli ŭ sabie mocny zarad stanoŭčaj enierhii.
U 1970-m hodzie Sajman i Harfankieł razyšlisia (darečy, nie ŭ pieršy i nie ŭ apošni raz). Sajman pačaŭ zapisvacca solna. Naprykład pieśnia Me & Julio Down by The Schoolyard ź pieršaha alboma Sajmana apošnija sorak hadoŭ vyklikaje sprečku — jak pravilna zrazumieć jaje tekst (za jakoje takoje złačynstva palicyja zatrymlivaje hieroja pieśni, a jahonaja maci pluje na ziamlu kožny raz, jak čuje jahonaje imia).
U 80-ja, kali muzyka pieražyvała nie najlepšy svoj pieryjad, Poł Sajman zapisvaje albom Graceland, u jakim iznoŭ ža apisvaje žyćcio ŭ novym dziesiacihodździ tak, što muzyčnyja krytyki ŭmomant zapisvajuć płaścinku ŭ śpis «Najlepšych albomaŭ usich časoŭ».
U 2011 hodzie Poł Sajman pierad svaim 70-hodździem vypuskaje novy albom. I što dziŭna: za apošnija 50 hadoŭ jon absalutna nie źmianiŭsia — heta toj samy naziralny čałaviek, jaki słuchaje huki cišyni i piša praniknionyja pieśni pra pytańni, jakija b zadaŭ aniołam.
